ماقپال ءجۇنىسوۆا قايىرىمدىلىققا 50 مىڭ ا ق ش دوللارىن جۇمساعان
بۇل جايىندا حالىق ءارتيسى Stan.kz اقپاراتتىق اگەنتتىگىنىڭ تىلشىسىنە بەرگەن سۇحباتىندا ايتىپ بەردى.
ماقپالدىڭ ايتۋىنشا، ونىڭ جەكە شوتىندا كوك تيىن جوق ەكەن. سەبەبى، تاپقان قارجىسىنىڭ ءبىراز بولىگىن وزىنەن كومەك سۇراعان جاندارعا اۋداراتىن بولىپ شىقتى. تۇرمىسى ناشار جەتىم- جەسىرلەرگە اقشالاي كومەك كورسەتسە، ءوز ەركىمەن ءجۇرىپ- تۇرۋدان قالعان مۇگەدەك جاندارعا تالاي رەت سۋ جاڭا اربا ساتىپ اپەرگەن سىڭايلى.
«سوڭعى ون جىلدىڭ ىشىندە قالتامنان 50 مىڭ دوللار كەتىپتى. بۇل تەك قانا قايىرىمدىلىق ماقساتتا عانا جۇمسالعان قارجى كولەمى. وپەراتسياعا، قينالعان جاندارعا، 1000, 2000 تەڭگەدەن بەرەسىڭ. وسىلاي بىلىنبەي كەتىپ قالادى ەكەن اقشا. نەگىزى مەن بەرگەنىمدى ايتپاۋشى ەدىم» ، - دەپ اعىنان جارىلدى حالىق ءارتيسى ماقپال ءجۇنىسوۆا.
ودان قالا بەردى، ساحنادا جارقىراپ جۇرەتىن انشىدەن كەيبىر ادامدار تويىنا تەگىن ونەر كورسەتىپ بەرۋىن دە وتىنەتىن كورىنەدى. وندايلارعا ءانشىنىڭ جاۋابى دا دايىن.
«بىردە ءبىر بەلگىسىز جىگىت تەلەفون شالىپ، مەنىڭ ۇيىمداستىرۋشىم سۇراعان قالاماقىنى تولەي المايتىنىن جەتكىزدى. سوندا مەنىڭ جاۋابىم بىلاي بولدى: «باۋىرىم- اۋ، ەندى اقشالارىڭ جوق بولسا، نەگە توي جاسايسىڭدار» ، - دەپ مەن ءوزىمنىڭ نازىمدى ايتتىم. ءار ادام وزىنشە ەڭبەك ەتەدى. ءبىزدىڭ ماماندىعىمىز سول. ءان ايتۋ، ەل- ەلدى ارالاۋ. ارى- بەرى تويعا ۇشاقپەن ۇشىپ بارامىز، ۇشىپ كەلەمىز. سونىڭ بارىنە نە ءۇشىن ۇشامىز؟ ول كەرەك بولعان سوڭ ۇشامىز. ساحناعا كويلەك تىكتىرتەمىز. تۋعان- تۋىسقاندارىمىزعا كومەكتەسەمىز» ، - دەيدى ماقپال.
حالىق ءارتيسى تۋعان- تۋىستارىن دا قارىق قىلادى ەكەن.
«مىسالى جاقىندا ەكى جيەن قىزىم كۇيەۋگە شىعايىن دەپ جاتىر. ولارعا قانشاما اقشا كەتىپ جاتىر. تويعا بارامىن سولارعا بەرەمىن، سوسىن ماشينالارىن دا جاڭارتىپ بەرىپ جاتىرمىن. سونىڭ ءبارى اقشا. مەن اقشا جيناپ جاتقان ادام ەمەسپىن» ، - دەيدى حالىق ءارتيسى.
ەلدىڭ ەركە قىزى ماقپال ءجۇنىسوۆا قايىرىمدىلىق جاساۋدان ەش قاشپايتىنىن جەتكىزدى. كەرىسىنشە، كوپشىلىكتى ساۋابى مول رامازان ايىندا قايىرىمدى بولۋعا شاقىردى.
