پحەنچحان وليمپياداسىنا 50 گە جۋىق جولداما الۋدى جوسپارلاۋدامىز - مۇسايبەكوۆ

بۇل تۋرالى بۇگىن ۇكىمەت ۇيىندە وتكەن باسپا ءسوز ءماسليحاتىندا ق ر مادەنيەت جانە سپورت ۆيتسە-ءمينيسترى ساكەن مۇسايبەكوۆ ايتتى، دەپ حابارلايدى قازاقپارات.

«وزدەرىڭىز دە بىلەسىزدەر، 2 ايدان كەيىن وڭتۇستىك كورەيانىڭ پحەنچحان قالاسىندا XXIII قىسقى وليمپيادا ويىندارى باستالادى. وعان 80 نەن استام ەلدەن 2500 گە جۋىق سپورتشى قاتىسادى. 15 سپورت ءتۇرى بويىنشا 102 مەدال ساراپقا سالىنادى. قازاقستان 9 سپورت تۇرىنەن وليمپياداعا قاتىسادى دەپ ويلايمىز. ءبىزدىڭ قۇراما كوماندانىڭ قورجىنىندا 23 جولداما بار»، - دەدى ول.

ۆيتسە-ءمينيستردىڭ دەرەگىنشە، اتالعان جولدامالاردىڭ 10 ى بياتلوننىڭ، 10 ى شورت-ترەكتىڭ، ال 3 ەۋى مانەرلەپ سىرعاناۋ سپورتىنىڭ ەنشىسىندە. ال قالعان قۇراما كوماندالار قازىرگى ۋاقىتتا شەتەلدە جارىستارعا قاتىسىپ، جولدامالاردى ۇتىپ الۋ جولىندا ءجۇر.

«ءبىز سپورتشىلارىمىزعا قاتتى سەنەمىز. 50 گە جۋىق جولداما الۋدى جوسپارلاپ وتىرمىز. تاعى دا ءبىر ايتا كەتەتىن جايت، وليمپيادا تۋرالى جەدەل حابار بەرۋ ءۇشىن جۋرناليستەرگە ريوداعى تاجىريبە قولدانىلادى. ءبىز وڭتۇستىك كورەيادا، پحەنچحاندا باسپا ءسوز ورتالىعىن اشامىز. جالپى، سپورتشىلارىمىزعا سەنىمىمىز مول. ولارعا تەك قانا ساتتىلىك پەن جەڭىس تىلەيمىز»، - دەدى ساكەن مۇسايبەكوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى