شىعىس قازاقستان اۋدانىندا كومىر 50 پايىزعا قىمباتتادى
قازىر بۇل قاجەتتىلىكتىڭ 720 مىڭ تونناسى جەتكىزىلىپ، ەل قىسقى وتىننىڭ 65-70 پايىزىمەن قامتىلىپ وتىر. ايماقتا كەنىشتەردەن ءوندىرىلىپ جاتقان كومىردى جۇرتقا جەتكىزىپ بەرۋمەن 34 دايىنداۋ- ءبولۋ پۋنكتى اينالىسۋدا، دەپ حابارلايدى قازاقپارات Altaynews سايتىنا سىلتەمە جاساپ.
وبلىستىق ەنەرگەتيكا، تۇرعىن ءۇي جانە كوممۋنالدىق شارۋاشىلىق باسقارماسى باسشىسىنىڭ ورىنباسارى رينات بولاتحاننىڭ ايتۋىنشا، بۇگىنگى كۇنى وڭىردە كومىر نارىعىنداعى جاعداي تۇراقتى. كومىر تاپشىلىعى جوق، كەنىشتەردەن تاسىمالدانىپ جاتقان وتىن قورى جەتكىلىكتى.
قازىر قاراجىرا كومىر كەنىشىنەن كومىردىڭ تونناسى 3 مىڭ 200 تەڭگەدەن بوساتىلىپ جاتىر. باسقارما باسشىسى ورىنباسارى اتاپ وتكەندەي، بۇل بيىلعى جىل ءۇشىن ناقتى بەكىتىلگەن باعا، وزگەرمەيدى.
كومىردى اسا كوپ قاجەت ەتەتىن وسكەمەن مەن سەمەي قالاسىنىڭ تۇرعىندارى قىس بويى 235-250 مىڭ توننا كومىر جاعادى. وبلىس ورتالىعىندا حالىققا كومىر ساتىپ وتىرعان «ۆەۋس» جشس- ءنىڭ زاشيتا مەن سول جاعالاۋ اۋدانىنىڭ سامار تاسجولى بويىنداعى قويمالارىندا كومىر ساتىپ الۋشىلارعا كىدىرىسسىز ساتىلۋدا. «ۆەۋس» - تىڭ اياگوز، زىريان، شەمونايحا، گلۋبوكوە اۋداندارى مەن قالا ماڭىنداعى پرەدگورنوە اۋىلىنداعى كومىر قويمالارىنان دا كومىر كۇنى بويى ساتىلادى. قىركۇيەك ايىنان بەرى ول قويمالاردان 140 مىڭ توننا كومىر ساتىلعان.
تاس كومىرگە دەگەن تاپشىلىق جوق بولعانىمەن، وبلىستا كومىردىڭ باعاسى 15-20 پايىزعا قىمباتتاپ كەتكەن. ەنەرگەتيكا مينيسترلىگى كومىردىڭ بۇلايشا قىمباتتاۋىنا تەمىر جول تاسىمالى قىزمەتى باعاسىنىڭ كوتەرىلۋىمەن ءتۇسىندىردى. ال وبلىستىق ەنەرگەتيكا جانە تۇكش باسقارماسىنىڭ مالىمەتى بويىنشا، قازىر (بىر اپتا بۇرىن - اۆت. ) وبلىستا كومىردىڭ ورتاشا باعاسى 10 مىڭ 389 تەڭگە، ال وسكەمەن قالاسىندا 8 مىڭ 50 تەڭگە بولىپ تۇر. جەرگىلىكتى جەردەگى تۇكش بولىمدەرى مەن اۋدان اكىمدىكتەرىنىڭ وبلىستاعى باسقارماعا بەرىپ وتىرعان سوڭعى مالىمەتتەرىنە قاراساق، وسى كۇنى كومىر بارلىق اۋدانداردا قولجەتىمدى باعاعا، ءتىپتى ارزانعا ساتىلىپ جاتىر.
«مالىمەتتە «زايسان اۋدانىندا كومىردىڭ تونناسى - 10 مىڭ 500، كۇرشىم اۋدانىندا -13 مىڭ، كاتونقاراعاي اۋدانىندا 12 مىڭ 500 تەڭگە» دەپ كورسەتىلگەن. وعان قاراپ وتىرىپ تۇرعىنداردىڭ، جەرگىلىكتى ەلدىڭ كومىر باعاسىنىڭ قىمباتتاپ كەتكەنى تۋرالى ايتىپ، جازىپ جاتقانى جالعان با دەپ قالاسىڭ. ءۇرجار اۋدانىنداعى كومىر باعاسىنىڭ قۇنى عانا شىندىققا جاقىن بولىپ شىقتى - 16 مىڭ تەڭگە ەكەن»، - دەپ جازادى وڭىرلىك سايت.
«وبلىستا كومىرمەن قامتۋعا بايلانىستى ەشقانداي ماسەلە جوق. وسكەمەن قالاسى، زىريان، اياگوز، گلۋبوكوە، شەمونايحا اۋداندارى بويىنشا كومىردى قويماعا تاسىمالداپ، ءبولۋشى- «ۆەۋس» تولايىم ساتىپ الۋ كاسىپورنى باسشىسىمەن، قاراجىرا كومىر كەنىشى، «ق ت ج» ا ق وكىلدەرىمەن، قالالىق اكىمدىكپەن بىرلەسە جيىن وتكىزدىك. «ۆەۋس» ج ش س قاراجىرا كەنىشىنە كومىر تاسىمالداۋ كولەمىن 20 ۆاگونعا كوبەيتۋگە تاپسىرىس بەرىپ وتىر. ياعني، بۇرىن تاۋلىگىنە ورتا ەسەپپەن 54 ۆاگون كومىر جەتكىزىلىپ تۇرسا، ەندى ول 74 ۆاگونعا كوبەيمەك. جولدا 100 ۆاگون كومىر كەلە جاتىر. ول كومىر اپتانىڭ اياعىندا كەلەدى. ءيا، «ۆەۋس» قويمالارىنىڭ الدىندا ۇزىن- سونار كەزەككە تۇرعان كولىكتەردىڭ كوپتىگىن كورىپ وتىرمىز. ءبىراق، بۇل كومىر جەتپەيتىندىكتى بىلدىرمەيدى. كۇزدە جاپا تارماعاي كومىر ساتىپ الۋعا ۇمتىلعان حالىق بۇل دۇربەلەڭدى قولدان جاساپ الىپ وتىر. بىلتىرعىمەن سالىستىرعاندا بيىل كومىردىڭ مولشەرى 122 پايىزعا كوپ. قاراجىرانىڭ كومىرىن دايىنداپ، جەتكىزۋمەن اينالىساتىن 33 سۋبەكتى بار. ءبارى دە ءوز ايماقتارىن كومىرمەن قامتىپ وتىر. وسكەمەن، زىريان، شەمونايحا، گلۋبوكوە اۋداندارىنداعى كومىر قويمالارىنا كومىر كۇندەلىكتى 24 ساعات بويى كەلىپ جاتىر. قازاقستان تەمىر جولىندا دا كومىر تاسىمالىنىڭ جاعدايى كۇندەلىكتى باقىلاۋدا»، - دەيدى باسقارما باسشىسىنىڭ ورىنباسارى رينات بولاتحان.
وسكەمەن قالاسى بويىنشا الەۋمەتتىك جاعىنان قورعالماعان تۇرعىندارعا الەۋمەتتىك كومىر 7600 تەڭگەدەن ساتىلۋدا. بۇل توپقا جاتاتىن تۇرعىندارعا 2017-2018 -جىلداردىڭ قىس مەرزىمىنە 35 مىڭ توننا كومىر قاراستىرىلعان. سوعىس ارداگەرلەرى، كوپبالالى انالار، زەينەتكەرلەر مەن مۇگەدەكتەرگە جەڭىلدىكپەن بەرىلەتىن كومىردى قاجەت ەتەتىندەردىڭ ءتىزىمى جاسالىپ، كومىر تاسىمالدانىپ، جەتكىزىلىپ جاتىر. وسى ۋاقىتقا دەيىن 35 مىڭ توننانىڭ 20 مىڭ تونناسى جەتكىزلگەن. كومىردىڭ بولىنۋىنە اۋعان سوعىسىنا قاتىسۋشىلاردىڭ ۇيىمى باقىلاۋ جۇرگىزۋدە.
«كەيبىر جەرگىلىكتى اكىمدىكتەگىلەردىڭ جاۋىردى جابا توقىپ، جوعارىعا بەرگەن ءوز اقپارلارىندا كومىر باعاسىنىڭ كوتەرىلمەگەنىن كورسەتىپ باققىسى كەلگەنىمەن، كومىر كۇتىپ جۇرگەن قارا حالىققا ودان قانداي قايىر. قالادا، وسكەمەندە 8 مىڭ 50 تەڭگە بولىپ، اۋىلعا ەكى ەسەلەنىپ، 16 مىڭ تەڭگە بولىپ جەتىپ جاتقان كومىرگە، كومىر نارىعىنا باقىلاۋ جۇرگىزىپ، رەتتەيتىن، ونىڭ قىمباتتاماۋىنا توسقاۋىل قويىپ جاتقان بىرەۋ بار ما؟»، - دەپ جازادى Altaynews.
«بىلتىر باسقارما كومىردىڭ كەنىشتەن شىعىپ، قويماعا تۇسكەنىنە، ودان ءارى قاراي تاسىمالدانىپ، اۋىلعا جەتكەنىنە دەيىنگى باعاسىنا تالداۋ جاسادى. قاراجىرادان قانشاعا ساتىلدى، قاي جەرگە قانداي باعامەن جەتكىزىلدى؟ كومىردىڭ جىلجۋ سحەماسىن جاسادىق. بىلتىر وبلىس ورتالىعىندا كومىر 7 مىڭ 200 تەڭگە بولعان. تالداۋ ناتيجەسىندە كومىردىڭ اۋىلعا دەيىن 20-25 پايىزعا ءوسىپ كەتكەندىگى انىقتالدى. ءار اۋدان اكىمدىگى، جەرگىلىكتى اكىمشىلىك كومىر باعاسىنىڭ اۋىلعا جەتكەنشە بۇلايشا كوتەرىلىپ، قىمباتتاپ كەتپەۋىنە توسقاۋىل قويىپ، كومىر نارىعىنداعى جاعدايدى رەتتەۋدىڭ تەتىكتەرىن تاۋىپ، وسى باعىتتا بەلسەندى جۇمىس جۇرگىزۋ كەرەك. بىلتىر كوكپەكتى، تارباعاتاي اۋداندارىنىڭ اكىمدىكتەرى مەموراندۋمدارعا وتىرىپ حالىققا جاقسى جاعداي تۋعىزدى. بۇل باعىتتا اۋدان اكىمدىكتەرى وسكەمەن قالاسى اكىمدىگىنىڭ اتقارىپ وتىرعان ءىس- شارالارىن نازارعا السا»، - دەيدى رينات بولاتحان.
