قازاق انيماتسياسىنىڭ 50 جىلدىعىنا وراي بايقاۋ جاريالاندى
ش. ايمانوۆ اتىنداعى «قازاق فيلم» كينوستۋدياسى جانە «جاس وركەن» سەرىكتەستىگىنە كىرەتىن «ۇلان»، «درۋجنىە رەبياتا» گازەتتەرى مەن «بالدىرعان»، «اق جەلكەن» جۋرنالدارى بىرلەسە وتىرىپ، قازاق انيماتسياسىنىڭ 50 جىلدىعىنا وراي جاس سۋرەتشىلەر اراسىندا «مەنىڭ سۇيىكتى مۋلتفيلمىم» اتتى شىعارماشىلىق بايقاۋىن وتكىزەدى.
«ۇستىمىزدەگى جىل - قازاق انيماتسياسى ءۇشىن ايتۋلى جىل. وسىدان 50 جىل بۇرىن، 1967 -جىلدىڭ كۇزىندە قازاق انيماتسياسىنىڭ العاشقى مۋلتفيلمى - «قارلىعاشتىڭ قۇيرىعى نەگە ايىر؟» كورەرمەنگە ۇسىنىلعان بولاتىن. ءبىز قازاق انيماتسياسىنىڭ نەگىزىن قالاۋشىلاردىڭ قالدىرعان مۇراسىنا قۇرمەتپەن قارايمىز.
بۇگىندە «قازاق فيلم» زاماناۋي تەحنولوگيالاردى قولدانا وتىرىپ، تولىقمەترلى انيماتسيالىق فيلمدەردى وندىرۋدە. ولاردىڭ ءبىرقاتارى حالىقارالىق فەستيۆالدەردەن جۇلدەلى ورىنداردى يەلەنىپ وتىر. بۇل بايقاۋدى قازاق انيماتسياسىن ەلىمىزدىڭ بالالارى اراسىندا ناسيحاتتاۋ ماقساتىندا جاساپ وتىرمىز» - دەدى ش. ايمانوۆ اتىنداعى «قازاق فيلم» كينوستۋدياسىنىڭ پرەزيدەنتى باقىت قايىربەكوۆ.
بايقاۋ «مەن جاقسى كورەتىن قازاق مۋلتفيلمى» جانە «مەنىڭ قيالىمداعى كەيىپكەر» اتتى ەكى نوميناتسيادان تۇرادى. ءبىرىنشى نوميناتسيادا قاتىسۋشىلار قازاق انيماتسيالىق مۋلتفيلمدەرىنىڭ جەلىسىندە سالىنعان سۋرەتتەرىن نەمەسە كوميكستەرىن جىبەرە الادى. ەكىنشى نوميناتسيا بويىنشا قاتىسۋشىلاردىڭ ءوز قيالىنان تۋعان، ەرتەگى، اڭىز- اڭگىمە مەن ميفتىك كەيىپكەرلەرى بەينەلەگەن شىعارماشىلىق جۇمىستارى قابىلدانادى.
بارلىق سۋرەتتەردى سالۋدا جانر بويىنشا ەركىندىك بەرىلەدى. سونداي-اق، شەتەلدىك مۋلتفيلمدەر مەن كەيىپكەرلەرى نەگىزىندە سالىنعان سۋرەتتەر قابىلدانبايتىنى ەسكەرتىلدى. تەك قانا قازاق انيماتسياسىنا قاتىستى بولۋى ءتيىس. بايقاۋعا ەلىمىزدىڭ بارلىق مەكتەپ وقۋشىلارى قاتىسا الادى. ەڭبەكتەر 15 -قازانعا دەيىن قابىلدانىپ، 24 -قازان كۇنى شىعاتىن «ۇلان» گازەتىندە قورىتىندىسى جاريالانادى. سونىمەن قاتار، ۇزدىك جۇمىستار «اق جەلكەن»، «بالدىرعان» جۋرنالدارى مەن «ۇلان»، «درۋجنىە رەبياتا» گازەتتەرىندە جارىق كورەدى. جۇمىستاردى «قازاق فيلم» ا ق انيماتسيا ءبولىمىنىڭ ماماندارى باعالايدى. جەڭىمپازدارعا پلانشەتتەر مەن ىنتالاندىرۋ يەلەرىنە سىيلىقتار مەن العىس حاتتار تاپسىرىلادى.
