قازاقستاندا مەملەكەتتىك قىزمەتكەرلەردىڭ جالاقىسى 50 پايىزعا ءوسۋى مۇمكىن
بۇل تۋرالى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى ايگۇل شاريموۆا مالىمدەدى، - دەپ حابارلايدى Tengrinews.kz ءتىلشىسى.
ونىڭ ايتۋىنشا، قازىرگى كەزدە ەكى نەگىزگى بولىمنەن تۇراتىن جاڭا تولەم جۇيەسى ەنگىزىلىپ جاتىر: داعدىلى جانە اۋىسپالى.
«نەگىزگىگىسى - قىزمەت بويىنشا. ياعني قىزمەت دەڭگەيى ستراتەگيالىق مىندەتتەردى جۇزەگە اسىرۋعا قانداي ۇلەس قوساتىندىعىنا بايلانىستى بولادى. ەگەر بۇرىن ەڭبەك ءوتىلى مەن كاتەگورياسى ەسكەرىلەتىن بولسا، جاڭا جۇيە بويىنشا قىزمەتكەر قانداي ۇلەس قوسىپ جاتقانىنا جانە قالاي قىزمەت ەتەتىندىگىن ەسكەرەدى»، - دەيدى شاريموۆا ۇكىمەتتەگى بريفينگ بارىسىندا.
سونىمەن بىرگە، جاڭا جۇيەنىڭ ەكىنشى بولىگى قوسىمشا اقى تولەۋ تۇسىن قاراستىرادى. «قوسىمشا اقى تولەۋ قىزمەتكەردىڭ ءىسىن توقسان سايىنعى باعالاۋعا بايلانىستى بولادى. ونىڭ جىلدىق ەڭبەگىنىڭ ناتيجەسى قوسىمشا اقى تولەۋگە اسەر ەتەدى»، - دەيدى ول.
قوسىمشا تولەمدى ناتيجە كورسەتەتىن ۇزدىك قىزمەتكەرلەر عانا الاتىن بولادى. «باعالاۋ بويىنشا قىزمەتكەرلەردىڭ ءتورت كاتەگورياسى بولادى. «ۇزدىك»، «ناتيجەلى»، «قاناعاتتاندىرارلىق» جانە «ناتيجەلى ەمەس».
قوسىمشا تولەمدى تەك «ۇزدىك» جانە «ناتيجەلىلەر» الاتىن بولادى»، - دەيدى شاريموۆا. قازىر بۇل جۇيە تالىقلانىپ جاتىر جانە ونىڭ پروباتسياسى كەلەسى جىلى ءۇش ورگاننىڭ ۇلگىسىندە جۇرگىزىلەتىن بولادى.
«كەلەسى جىلى پيلوتتىق تۇردە ەنگىزەمىز. بارلىق كەمشىلىگى مەن ارتىقشىلىعىن كورگەن سوڭ عانا قازاقستان بويىنشا ەنگىزەمىز. الدىن الا ولشەم بويىنشا ەڭبەكاقى 50 پايىزعا وسەدى. بۇل الدىن الا بولجام عانا، ءدال سولاي بولادى دەپ ايتا المايمىن»، - دەيدى شاريموۆا.
