قازاقستانداعى مۇنايلى وڭىردە جىلىنا 50 مىڭ تونناداي قالدىق شىعارىلادى
وسى سالادا ەڭبەكتەنىپ جۇرگەن ورالدىق عالىمداردىڭ تاجىريبەلەرىن وندىرىسكە ەنگىزەر كۇن الىس ەمەس. ماسەلەن، جاڭگىر حان اتىنداعى باتىس قازاقستان اگرارلىق- تەحنيكالىق ۋنيۆەرسيتەتىنىڭ عالىمدارى قولعا العان كەزەكتى جوبا كەرامزيت وندىرىسىندە كەڭىنەن قولدانىلۋى مۇمكىن، دەپ حابارلايدى 24.kz.
مۇناي قالدىعىنا ارنايى قوسپالاردى قوسۋ ارقىلى الىناتىن دايىن ءونىم كۇيدىرۋ پەشتەرىنە جۇمسالاتىن قۋات كوزىن بىرنەشە ەسەگە تومەندەتپەك. تەك باتىس قازاقستان وبلىسىندا جىلىنا 50 مىڭ تونناداي مۇناي قالدىعى شىعارىلادى. ونى ساقتاپ، كومۋ مەن جويۋ الەم ەلدەرىنە ورتاق پروبلەما. ال، ورالدىق عالىمدار ونى كادەگە جاراتۋدىڭ ءتيىمدى جولىن ۇسىنىپ وتىر. مۇناي قالدىعىنا قوساتىن شيكىزات رەتىندە تابيعاتتا كوپ كەزدەسەتىن ساز بەن قۇم پايدالانىلادى. سونىڭ ەسەبىنەن دايىن ءونىمنىڭ وزىندىك قۇنى تومەندەيدى ءارى ەنەرگيا ۇنەمدەلەدى، - دەيدى جوبا اۆتورلارى.
«ونىڭ فيزيكالىق، حيميالىق قۇرامىن زەرتتەگەن كەزدە ونىڭ وسى فيزيكالىق، حيميالىق قۇرامدارى ءبىزدىڭ ەنەرگيانى كوپ قاجەت ەتەتىن تەحنولوگيالىق پروتسەستەرگە وتە پايدالى ەكەنىن ءبىز دالەلدەدىك. ويتكەنى مۇناي وتە جانعىش زات. جانعىشتىعى كادىمگى كومىرمەن پاراپار. سوندىقتان ونى پوليگونعا اپارىپ، كومىپ تاستاۋ نەمەسە ونى جاعىپ جىبەرۋ وتە ءتيىمسىز دەپ ەسەپتەيمىز. قويمالجىڭ كۇيدەگى مۇناي قالدىعى الدىمەن ساز بالشىقپەن ارالاستىرىلادى. كەيىن تۇيىرشىكتەلگەن سوڭ كەپتىرىلەدى. ەڭ سوڭىندا كۇيدىرۋ پەشىنە جىبەرىلەدى. عىلىمي زەرتتەۋ ينستيتۋتىندا كۇردەلى تەحنولوگيالىق ۇدەرىستەرگە تاجىريبە جاساۋعا مۇمكىندىك بەرەتىن كۇيدىرۋ پەشى بولعاندىقتان، العاشقى سىناقتار ءساتتى جاسالدى»، - دەيدى ينجينيرينگ جانە رەسۋرستاردى ۇنەمدەۋ ع ز ي ديرەكتورى سارسەنبەك مونتايەۆ.
«مۇناي قالدىعىنا سارعىش توپىراقتىڭ بالشىعى مەن وزگە دە كومپونەنتتەردى ارالاستىردىق. ناتيجەسىندە فيزيكالىق قاسيەتى كەرامزيتكە ءتان بولىپ كەلەتىن زاتتىڭ ۇلگىسى انىقتالدى. الەم بويىنشا كادىمگى كەرامزيت وندىرىسىندە پايدالانىلاتىن سازدىڭ قورى بىتۋگە تاياۋ. ال ءبىز قولداناتىن سارعىش توپىراق تابيعاتتا كوپ كەزدەسەدى. مۇناي قالدىعى تەز جانادى، ءارى قوسپانىڭ كولەمىنىڭ ارتۋىنا اسەر ەتەدى. سوندىقتان ەنەرگيا دا از جۇمسالادى»، - دەيدى قۇرىلىس جانە قۇرىلىس ماتەريالدارى كافەدراسىنىڭ مەڭگەرۋشىسى نۇرگۇل ءادىلوۆا.
