الماتىدا وتەتىن ۋنيۆەرسيادا ويىندارىنا 50 ەلدىڭ سپورتشىلارى كەلەدى دەپ كۇتىلۋدە - ن. نۋروۆ
ءىس جۇزىندە 50 ەلدىڭ سپورتشىلارى الماتىعا كەلۋى مۇمكىن ەكەنىن جاسىرمادى.
«ءبىز الماتىنى ۋنيۆەرسيادا كەزىندە 64 ەلدى قابىلداي الادى دەپ ايتا الامىز. بۇل ماكسيمالدى كورسەتكىش. بۇگىنگى ءبىزدىڭ اتلەتتەر قالاشىعى، سپورتتىق نىساندار، ترانسپورت، لوگيستيكالىق مۇمكىندىكتەرىمىز 64 ەلدىڭ 5000 عا جۋىق سپورتشىسىن قابىلداۋعا مۇمكىندىگى جەتەدى»، - دەدى نايل نۋروۆ.
كەزدەسۋ بارىسىندا نايل نۋروۆ وسىعان دەيىنگى رەكوردتىق كورسەتكىش ەرزۋرۋم قالاسىندا تىركەلگەنىن ايتىپ ءوتتى. ەرزۋرۋمدە 52 ەل ۋنيۆەرسياداعا قاتىسقان بولاتىن.
«ويىندار ەۋروپادا وتكەن كەزدە لوگيستيكانى جەڭىلدەتەتىنى انىق. ەۋروپادا ۋنيۆەرسياداعا قاتىسپايتىن ەل جوق. ءبىز ەرزۋرۋمنىڭ رەكوردىن بۇزۋعا تالپىندىق. ءبىراق بۇگىنگى كۇنى الەمدە ەكونوميكالىق قيىن جاعدايلاردىڭ ورىن الۋى ارمانىمىزدىڭ ورىندالۋىنا كەدەرگى بولدى. بىزگە 64 ەلدەن ەمەس، 50 ەلدىڭ سپورتشىلارى كەلۋى مۇمكىن دەپ جوبالاپ وتىرمىز. ءبىراق تىركەلۋ جۇمىستارى ءالى اياقتالمادى. جىل سوڭىنا دەيىن بىزدە ءالى ۋاقىت بار»، - دەپ حابارلادى 2017-جىلعى قىسقى ۋنيۆەرسيادا ديرەكتسياسىنىڭ باسشىسى.
سونىمەن قاتار نايل نۋروۆ، ۇلتتىق ستۋدەنتتەر سپورتى فەدەراتسيالارىنىڭ ۋنيۆەرسياداعا قاتىسۋىن قامتاماسىز ەتۋ حالىقارالىق ستۋدەنتتەر سپورتى وداعىنىڭ (FISU) قاراۋىندا ەكەنىن دە ايتىپ ءوتتى. «ءبىز وسى سۇراق بويىنشا FISU كومەگىنە جانە قازاقستان ۇلتتىق سپورتتىق ستۋدەنتتەر وداعىنىڭ كومەگىنە جۇگىنەمىز»، - دەپ ءسوزىن اياقتادى نايل نۋروۆ.
بەلگىلى بولعانداي، FISU رەگلامەنتى بويىنشا قاتىسۋعا مۇمكىندىك بەرەتىن اككرەديتاتسياعا ءوتىنىش جىبەرۋ 2016-جىلدىڭ 29- قاڭتارىنان 2017-جىلدىڭ 29- قاڭتارىنا دەيىن جالعاسادى.
ايتا كەتەيىك، ۋنيۆەرسياداعا اككرەديتتەۋدىڭ ءبىرىنشى كەزەڭىندە 64 ەل قاتىسۋعا ءوتىنىش بىلدىرگەن بولاتىن. ەكىنشى كەزەڭدە قاتىسۋشى ەلدەر كوماندا ءتىزىمى مەن سپورت تۇرلەرى جانە سپورتشىلار مەن رەسمي ادامداردىڭ ناقتى سانىن ناقتىلاۋى ءتيىس.
