قىتايداعى جارىلىس سالدارىنان قازا تاپقانداردىڭ سانى 50 ادامعا جەتتى
قازىر 50 ادامنىڭ قازا تاپقانى جانە 701 ادامنىڭ جاراقاتتانعانى (ولاردىڭ 71 نىڭ جاعدايى اۋىر)، تاعى 21 ءىز-ءتۇزسىز جوعالدى دەپ ەسەپتەلەتىنى بەلگىلى.
ريا نوۆوستي حابارلاعانداي، سارسەنبى كۇنى بينحاي اۋدانىندا Ruihai Logistics لوگيستيكالىق كومپانيا قويماسىندا جەرگىلىكتى ۋاقىتپەن ساعات 23.30 اراسى 30 سەكۋندتاي بولاتىن ەكى جارىلىس ورىن العان. جارىلىستىڭ كۇشتى بولعانى سونشالىق، ونى ءتىپتى جەرگىلىكتى سەيسمولوگيالىق قىزمەت تىركەگەن. ولاردىڭ قۋاتتىلىعى تروتيل ەكۆيۆالەنتىندە 3 جانە 21 توننانى قۇرادى. جارىلىستان كەيىن ءورت شىقتى.
ب ا ق مالىمەتتەرىنە قاراعاندا ونىڭ اۋماعى شامامەن 20 مىڭ شارشى مەتردى قۇرادى. توتەنشە جاعداي سەبەبى ازىرگە بەلگىسىز، الايدا ب ا ق- تىڭ حابارلاۋىنشا، وعان Ruihai Logistics لوگيستيكالىق كومپانياسىنىڭ قاۋىپسىزدىك جۇيەسىندەگى ولقىلىقتار سەبەپ بولۋى مۇمكىن. ونىڭ باستىعى ۇستالدى.
«تيانجيندەگى جارىلىس قۇرباندارىنىڭ سانى 50 ادامعا جەتتى»، - دەلىنگەن شينحۋا اگەنتتىگىنىڭ حابارلاماسىندا. وسىعان دەيىن اگەنتتىك بيلىككە سىلتەمە جاساپ، كەم دەگەندە 21 ادام ءىز- ءتۇزسىز جوعالدى دەپ ەسەپتەلەتىنىن حابارلاعان. ولاردىڭ ىشىندە ءورت سوندىرۋشىلەر دە بار.
CCTV تەلەارناسىنىڭ حابارلاۋىنشا، جاپا شەككەندەردىڭ كوبى كومپانيا ماڭىنداعى ۇيلەردىڭ تۇرعىندارى. جاپا شەككەندەردىڭ ىشىندە وقيعا ورنى ماڭىندا كولىكتە بولعاندار دا بار.
