پاتەرىنەن 50 مىڭ ادام قۋىلدى
ءبىراق جاعداي ءالى تۇراقتانا الار ەمەس. قايتا جىل وتكەن سايىن كۇردەلەنىپ بارادى.
اسىرەسە، بەلگيا بيلىگى اۋىرلاي تۇسكەن تۇرمىستىڭ شەشىمىن تابا الماي وتىر.
2008 - جىلدان بەرى يپوتەكالىق قارىزىن وتەي الماعان ەلدەگى 50 مىڭ ادام وزدەرىنىڭ پاتەرىنەن قۋىلدى. ولاردىڭ بارلىعى دا بانكتەن العان نەسيەسىن وتەۋگە قاۋقارسىز.
ءبىر عانا مىسال، ەرلى-زايىپتى كاترين مەن پەر جانە ۇلى نيكولاس باسپاناسىنان ايىرىلدى. ەكى-ءۇش جىل بۇرىن ۇشەۋى دە جۇمىستان قىسقارىپ، يپوتەكانى تولەۋگە مۇمكىندىگى بولماي قالعان كەزدە، بانك ولاردان پاتەردى تارتىپ الدى.
وسى وقيعادان ءبىر اپتا وتكەن سوڭ، «مەن ەندى شاراسىزبىن، كەشىرىڭدەر مەنى» دەپ جالعىز ۇلى نيكولاس ارتىنا حات قالدىرىپ، وزىنە قول سالدى. سودان كەيىن ەكى قاريا دالادا قالدى. مىنە، ەرتەگىدەي كورىنەتىن ەۋروپانىڭ ءوزى قازىر وسىنداي كۇي كەشىپ وتىر.
ال جاسى جەتپىستەن اسقان قاريالار كاترين مەن پەردى كىم جۇمىسقا الا قويسىن؟! امالدىڭ جوعىنان ولار قازىر قايىر سۇراپ كۇنەلتىپ ءجۇر. ءتىپتى جاعدايدىڭ ادام شوشىرلىق ەكەنىن مىنا ءبىر كورىنىستەن-اق بايقاۋعا بولادى: قايىر سۇراپ وتىرعان جىلى ورنىن 5 مينۋتقا تاستاپ كەتسە بولدى، باسقا بىرەۋ كەلىپ، يەلەنىپ وتىرىپ الادى نەمەسە قوعامدىق باقىلاۋ جاساپ جۇرگەن ءتارتىپ ساقشىلارى كوشەدە وزدەرى جامىلىپ جاتقان توسەكتى الىپ كەتەدى. قۇقىق قورعاۋ ورگاندارىنىڭ وكىلدەرى قانشا قۋالاسا دا، ءبىر توپ باسپاناسىز ۇكىمەت ءۇيى مەن پارلامەنت عيماراتىنىڭ الدىنا كەلىپ، قونۋىن توقتاتپاي وتىر.
ءبىراق الداعى ۋاقىتتا جاعداي وزگەرەدى دەگەنگە سەنۋ قيىن. ويتكەنى عالامدىق داعدارىستىڭ ەل قازىناسىنا قاتتى اسەر ەتۋىنە قاتىستى ۇكىمەت بيۋدجەت شىعىنىن بيىل تاعى دا 1,5 ميلليارد ەۆروعا قىسقارتپاق. باسپاناسىز قالعاندار دا ەندى ەل ۇكىمەتىنەن قايىر بولا قويمايتىنىن ءتۇسىنىپ وتىر.
«ايقىن»
