انكاراداعى «قازاقستاننىڭ مۋزىكالىق كەشى» 50 ەلدە تىكەلەي ەفيردە كورسەتىلدى
قازاقستاننىڭ تۇركياداعى ەلشىلىگىنىڭ قولداۋىمەن تۇركيانىڭ قۇرىلۋىنىڭ 91 جىلدىعىنا ورايلاستىرىلعان ءىس-شارا مادەني-گۋمانيتارلىق سالاداعى قازاق-تۇرىك ىنتىماقتاستىعىنىڭ جارقىن كورىنىسى بولىپ تابىلدى.
ءىس-شاراعا «ترت- اۆاز» تەلەارناسىنىڭ باسشىسى يۋكسەل دەگەرجان، قازاقستاننىڭ تۇركياداعى ەلشىلىگىنىڭ قىزمەتكەرلەرى، انكارا ديپلوماتيالىق كورپۋسى مەن انكارالىق مادەني ەليتا وكىلدەرى، قوعامدىق-ساياسي قايراتكەرلەر، تۇركيا پارلامەنتىنىڭ دەپۋتاتتارى، قازاق دياسپوراسى مەن ستۋدەنتتەر، سونداي-اق انكارا قالاسىنىڭ ونەرسۇيەر قاۋىمى قاتىستى.
«باۋىرلاس قازاقستاننىڭ ونەر شەبەرلەرىنىڭ كونسەرتى ءبىزدى تامساندىردى. قازاق مۋزىكاسىنان ءبىز وزىمىزگە جاقىن كەلەتىن تۇركى اۋەندەرىنىڭ لەبىن سەزىنە الدىق. ءبىز مادەني-گۋمانيتارلىق سالا بويىنشا قازاق-تۇرىك قارىم-قاتىناستارىنىڭ بەلسەندى دامىپ كەلە جاتقانىنا قۋانىشتىمىز»، - دەدى «ترت-اۆاز» تەلەارناسىنىڭ باسشىسى يۋكسەل دەگەرجان.
بۇل كونسەرت تۇركيادان باسقا، ەۋروپانىڭ، تاياۋ شىعىستىڭ، ورتالىق ازيانىڭ 50 شاقتى ەلىندە، ونىڭ ىشىندە قازاقستاندا دا تىكەلەي ەفيردە كورسەتىلدى.
