الەمدە ەر ادامداردىڭ 50 پايىزعا جۋىعى سەكسۋالدى بەلسەندىلىكتىڭ بۇزىلۋىنان زارداپ شەگەدى - م. ءابدىقاسوۆ

بۇل تۋرالى بۇگىن الماتىدا ەلىمىزدە تۇڭعىش رەت «ەر ادامدار دەنساۋلىعى، ءومىر ساپاسى، ءپان ارالىق ءتاسىل» اتتى بۇكىل الەمدىك كونگرەسس جانە ISSAM- نىڭ «كانتسەروفوبيادان قاتەرلى ىسىكتى الدىن الۋعا دەيىن: جىنىس گورموندارىنىڭ جەتىسپەۋشىلىگى جانە ينسۋلينورەزيستەنتتىك» تاقىرىبىنداعى VIII حالىقارالىق كونگرەسى بارىسىندا «اكادەميك ب. و. جاربوسىنوۆ اتىنداعى ۋرولوگيا عىلىمي ورتالىعى» ا ق ءبولىم مەڭگەرۋشىسى، دوتسەنت مەيىرحان ءابدىقاسوۆ مالىمدەدى.

ونىڭ ايتۋىنشا، گورمونالدىق جانە سەكسۋالدىق بەلسەندىلىگى بۇزىلعان ادامدارعا بەدەۋ دەپ ايدار تاعۋعا استە بولمايدى.

«ۋرولوگتار ادەتتە «بەدەۋ» دەگەن اتاۋدى قولدانباۋعا تىرىسادى. ويتكەنى بۇل ءسوز ەر ازاماتتارعا ۇكىم سەكىلدى ەستىلەدى. ياعني، پسيحيكاعا وتە جاعىمسىز اسەر ەتەدى. سوندىقتان بۇلاي ايتۋعا بولمايدى. مەنىڭ ايتارىم، ەر ازاماتتاردىڭ جىنىستىق بەلسەندىلىكتەرىنىڭ بۇزىلۋىن كوپ جاعدايدا ءدارى-دارمەكتەرمەن-اق ەمدەۋگە بولادى! ول كوبىنەسە گورمونداردىڭ جەتىسپەۋشىلىگىنەن ورىن الادى ەمەس پە!؟ سونىمەن قاتار، وعان ارينە سترەسستىك جاعدايلار، قابىنۋ ۇدەرىستەرى، ماتەريالدىق جاعدايدىڭ بولماۋى، دۇرىس تاماقتانباۋ جانە باسقا دا زياندى ادەتتەر كەرى اسەر ەتەدى. قالاي بولعاندا دا، سەكسۋالدىق بەلسەندىلىكتىڭ بۇزىلۋ جاعدايىن ەمدەۋگە بولادى. دەمەك، بۇل جەردە ۋايىمداۋدىڭ كەرەگى جوق!» - دەدى ءوز سوزىندە م. ءابدىقاسوۆ.

سونداي-اق مەيىرحان ءابدىعالي ۇلى قاجەت جاعدايدا بۇل سالادا حيرۋرگيالىق تۇزەتۋ وتالارى دا جاسالاتىندىعىن جەتكىزدى. ءبىراق قازىرگى جاعدايدا بۇل ماسەلەگە كەشەندى تۇرعىدا قاراعان ءجون. ءپان ارالىق ءتاسىل، ياعني بۇل ماسەلەنى شەشۋگە مەديتسينانىڭ كوپتەگەن سالالارى جۇمىلدىرىلۋى ءتيىس.

ايتا كەتەيىك، ەرتەڭ عىلىمي فورۋم ءوز جۇمىسىن جالعاستىرادى. ال بۇگىنگى كونگرەسس بارىسىندا 18 بايانداما جاسالدى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى