استانا ماڭىنداعى جاسىل بەلدەۋگە 500 مىڭعا جۋىق كوشەت وتىرعىزىلادى
پرەمەر-ءمينيستردىڭ ءبىرىنشى ورىنباسارى رومان سكليار، استانا قالاسىنىڭ اكىمى جەڭىس قاسىمبەك، اقمولا وبلىسىنىڭ اكىمى ەرمەك مارجىقپايەۆ قالامەن شەكارالاس اۋماقتى اۋەدەن باقىلادى، دەپ حابارلايدى قازاقپارات ۇكىمەت سايتىنا سىلتەمە جاساپ.
ماڭايدى تىكۇشاقپەن ارالاۋ بارىسىندا مايبالىق كولىنىڭ، پرەوبراجەنسك سۋ تورابىنىڭ جانە ت. ب. كولەمى ناقتىلاندى.
جاڭا اۋىز سۋ ستانساسىنىڭ (3-س س س) پايدالانۋعا بەرىلۋىن جانە سۋ تۇتىنۋ كولەمىنىڭ كوبەيگەنى ەسكەرىلە وتىرىپ، قالاعا سۋ بۇرۋ كولەمى ارتتى. تازارتۋ قۇرىلىستارىنىڭ (1-ك ت ق) قۋاتى جەتكىلىكسىز، سوندىقتان وسى جىلدىڭ كۇزىندە ەكىنشى كارىز تازارتۋ قۇرىلىسى (2-ك ت ق) باستالادى. بۇل عيماراتتىڭ قۋاتى تاۋلىگىنە 200 مىڭ تەكشە مەتر بولماق.
سونداي-اق، ارالاۋ بارىسىندا «استانا-كوگالداندىرۋ قۇرىلىسى» ج ش س- گە قاراستى ءتالىمباققا باردى. ونىڭ اۋدانى 350 گەكتارعا جۋىق، ءارتۇرلى اعاش تۇرلەرىنىڭ كوشەتتەرى وسىرىلەدى. ءتالىمباق جىل سايىن 30 مىڭ دانا كوشەت بەرە الادى. 2025-جىلدان باستاپ اعاش تۇقىمدارىنىڭ 100 مىڭ كوشەتىنە، تامىر جۇيەسى جابىق 45 مىڭ بۇتاعا جانە تامىر جۇيەسى اشىق 300 مىڭ بۇتاعا دەيىن كوبەيتىلەدى دەپ جوسپارلانىپ وتىر.
سونداي-اق، جىل سايىن جاسىل بەلدەۋدەگى كوشەتتەر سانى ارتىپ كەلەدى. مىسالى، بيىلدىڭ وزىندە تەك جاسىل بەلدەۋدە 500 مىڭعا جۋىق جاسىل جەلەك (اعاشتار، بۇتالار جانە ت. ب.) وتىرعىزۋ جوسپارلانىپ وتىر. قالانىڭ وزىندە وسى كولەمدە جاسىل جەلەك وتىرعىزىلماق. ەلوردانىڭ جاسىل بەلدەۋىنىڭ جالپى اۋدانى - 15 مىڭ گەكتار. وندا 11,5 ميلليوننان استام اعاش پەن 2 ميلليون بۇتا وسەدى. نەگىزىنەن جاپىراقتى اعاش تۇرلەرىنە باسىمدىق بەرىلەدى.
