قىتايدا سۋ تاسقىنىنان 500 مىڭنان استام ادام زارداپ شەكتى
وتكەن اپتادان بەرى قىتايدىڭ ورتالىق جانە شىعىس ايماقتارىندا جاۋعان تولاسسىز جاڭبىر ۇلكەن سۋ تاسقىنىنا ۇلاستى، سالدارىنان ءبىر جياڭشي پروۆينسياسىنىڭ وزىندە 536 مىڭ ادام زارداپ شەگىپ، 16 مىڭ تۇرعىن ەۆاكۋاتسيالاندى.
حابارلاماعا سايكەس، جياڭشي پروۆينتسياسىندا (شىعىس قىتاي) سۋ تاسقىنى سالدارىنان جۇزدەن استام ءۇي زارداپ شەكتى، 2,3 مىڭ گەكتار اۋماقتاعى ەگىس القابى جويىلدى. تىكەلەي ەكونوميكالىق شىعىن 670 ميلليون يۋانعا (97 ميلليون دوللار) باعالاندى.
تولاسسىز جاۋعان جاڭبىردان ەلدەگى 21 وزەندە سۋ دەڭگەيى قاۋىپسىز دەڭگەيدەن اسىپ كەتكەن.
بولجام بويىنشا، مامىردىڭ 11 ى مەن 13 ى ارالىعىندا قىتايدىڭ وڭتۇستىك ايماقتارىندا، ونىڭ ىشىندە گۋاڭدۋڭ، حاينان جانە گۋاڭشي-جۋاڭزۋ اۆتونوميالىق اۋدانىندا ءبىر مەزگىلدە نوسەر جاۋىن جاۋادى.
قىتاي حالىق رەسپۋبليكاسىنىڭ سۋ تاسقىنى مەن قۇرعاقشىلىققا قارسى كۇرەس جونىندەگى مەملەكەتتىك شتابى بەيسەنبى كۇنى كەشكە سۋ تاسقىنىنا قارسى توتەنشە جاعداي رەجيمىنىڭ ەنگىزىلگەنىن حابارلادى.
جەرگىلىكتى بيلىك سۋ باسۋى مۇمكىن ايماقتاردا ورنالاسقان تۇرعىنداردى ەۆاكۋاتسيالاۋ ءۇشىن الدىن الۋ شارالارىن جۇرگىزۋدە.
