استانادا 500 دەن اسا ادام كوكتايعاقتا قۇلاپ، اۋرۋحاناعا جۇگىنگەن
كوكتايعاقتا تايىپ جىعىلىپ، جاراقات العان 500 دەن اسا ادام دارىگەرلەردىڭ كومەگىنە جۇگىنگەن. بۇنداي وقىس وقيعاعا ۇرىنباس ءۇشىن جۇرت كوكتايعاق كەزىندە دىتتەگەن جەرگە قالاي امان- ەسەن جەتۋ كەرەگىن ءبولىسىپ تە جاتىر. ولار الەۋمەتتىك جەلىلەرگە لايفحاكتارىن سالىپ جاتىر. ال بۇنداي ادىستەر شىن مانىسىندە جۇمىس ىستەي مە، جوق پا؟
بۇل - قاقاعان قىستا، كوكتايعاقتا تايىپ جىعىلماي ءجۇرۋدىڭ حالىق اراسىندا كەڭ تاراعان ادىستەرى. ءبىرى اياقكيىمىنە قاراپايىم لەيكوپلاستىر جابىستىرسا، ەندى ءبىرى سكوتچتىڭ كومەگىنە جۇگىنگەن.
ال سەمەي تۇرعىنى الماگۇل مۇقاتايەۆا ءار ءۇيدىڭ اس بولمەسىندە بار ىدىس قىرعىشتى پايدالانۋعا كەڭەس بەرەدى. ونىڭ ايتۋىنشا، جالتىراپ تۇرعان مۇز ۇستىندە دىتتەگەن جەرىڭە قورىقپاي جەتەسىڭ.
«اياعىمىزعا تاجىريبە جاساپ كيدىك، ادامدار قۇلاي ما، قۇلاماي ما دەپ. ءوزىمىز كەشە جۇمىسقا ارەڭ كەلدىك. سودان كەيىن وسىنى تايماسىن دەپ سالىپ ەدىك. جالعىز ءوزىم جاقسىلىقتى كورمەي، حالىق تا كورسىن دەگەن وي بولدى»، - دەيدى قالا تۇرعىنى الماگۇل مۇقاتايەۆا.
ال قالا تۇرعىنى وكسانا پوپكوۆا قالادا كوكتايعاققا قارسى جۇرگىزىلىپ جاتقان جۇمىس دۇرىس ورىندالماي جاتىر دەيدى.
«مىنا ىدىس قىرعىش قۇرال جاقسى بولدى. مۇز ۇستىندە بىلق ەتپەي جۇرەسىڭ. كەشە كۇنى بويى وسىنى اياعىما تاعىپ الدىم. باسقا امالىمىز جوق. قالادا قۇم سەبۋ جۇمىسى دۇرىس جۇرگىزىلىپ جاتقان جوق. كوشەدە ءجۇرۋ مۇمكىن ەمەس»، - دەيدى ول.
ال ەتىكشى - مامان راشيد ميرزافايزوۆتىڭ ايتۋىنشا، جۇرتتىڭ ويلاپ تاۋىپ جاتقان بۇنداي لايفحاكتارى - ۋاقىتشا شەشىم. قىستا اياقتى نىق باسىپ ءجۇرۋ ءۇشىن دۇرىس ەتىك تاڭداۋ كەرەك نەمەسە مۇزدا تايعانامايتىن رەزەڭكە جابىستىرىپ الۋ قاجەت.
«استىنا رەزەڭكە جابىستىرامىز. قىسقى ماتەريال تايعانامايدى. سۋىقتا قاتپايدى. جۇمساق بولىپ كەلەدى. قىسقى اياقكيىمدەردى دە دۇرىس تاڭداۋ ماڭىزدى. اسىرەسە ارقانىڭ سارىشۇناق ايازىنا شىداس بەرىپ، سۋىقتان جارىلىپ كەتپەيتىن، كوكتايعاقتا قۇلاتپايتىن اياقكيىم الۋ قاجەت. كليەنتتەرىمىز يتاليالىق اياقكيىم كيەدى. قىمبات. ءبىراق استى جاعى ءبىزدىڭ قىسقا سايكەس كەلمەيدى. قورعاناتىنىمەن بولعانى دۇرىس. قالىڭ بولسا، تايعانامايدى»، - دەيدى ەتىكشى راشيد ميرزافايزوۆ.
