اتىراۋدا قوس ازاماتتىعى بار ايەلگە 500 مىڭ تەڭگە ايىپپۇل سالىندى
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنە قاراعاندا، اتىراۋ وبلىسىنىڭ تۇرعىنى 13 جىل بويى قوس ازاماتتىقتى زاڭسىز پايدالانىپ جۇرگەنى انىقتالعان.
«ايەلدىڭ 1998 -جىلى رەسەيلىككە تۇرمىسقا شىعىپ، رەسەي فەدەراتسياسىنا كوشىپ كەتكەنى بەلگىلى بولدى. ول 2007 -جىلى رەسەي فەدەراتسياسىنىڭ ازاماتتىعىن قابىلداعان. ءبىراق، بۇل تۋرالى ق ر ىشكى ىستەر ورگاندارىنا ءتيىستى 30 كۇندىك مەرزىمدە حابارلاماعان. قازاقستاننىڭ ازاماتتىعىن راستايتىن جەكە كۋالىگىن تاپسىرماعان. سونداي- اق، ونىڭ 2012- 2019 -جىلدار ارالىعىندا قازاقستان رەسپۋبليكاسىنا بىرنەشە رەت كەلىپ، رەسەي فەدەراتسياسىنىڭ تولقۇجاتىمەن ەلدەن شىعىپ كەتكەنى انىقتالدى. ايەل قۇرمانعازى اۋداندىق پوليتسيا بولىمىنە جەتكىزىلدى» - دەپ حابارلادى دەپارتامەنتتىڭ باسپا ءسوز قىزمەتى.
قوس ازاماتتىعى بار ازاماتشاعا قاتىستى ق ر اكىمشىلىك قۇقىقبۇزۋشىلىق تۋرالى كودەكسىنىڭ 496-بابىنىڭ 2-بولىگىمەن (ق ر زاڭناماسىندا بەلگىلەنگەن مەرزىمدە شەتەلدىك ازاماتتىقتى الۋ فاكتىسىن حابارلاماۋ) اكىمشىلىك حاتتاما تولتىرىلىپ، وعان 200 ايلىق ەسەپتىك كورسەتكىش مولشەرىندە ايىپپۇل سالىندى.
