ەلوردادا پوليتسياعا كومەك كورسەتكەن 500 گە جۋىق ازامات ماراپاتتالدى

24-جەلتوقساندا قالالىق پوليتسيا قىزمەتى باسقارماسى قوعامدىق كومەكشىلەرمەن 2019 -جىلدىڭ قورىتىندى كەزدەسۋىن وتكىزدى.

شارا بارىسىندا ەلوردالىق پ د باسشىلىعى ۇساق قۇقىق بۇزۋشىلىقتاردىڭ جولىن كەسىپ، قىلمىستاردى اشۋعا ات سالىسقان قوعامدىق كومەكشىلەر مەن ۇكىمەتتىك ەمەس ۇيىمداردىڭ وكىلدەرىن ماداقتاما قاعازدارىمەن، باعالى سىيلىقتار جانە العىس حاتتارمەن ماراپاتتادى.

قازىرگى ۋاقىتتا ەلوردانىڭ 700 گە جۋىق تۇرعىنى قوعامدىق ءتارتىپتى كۇزەتۋدى قامتاماسىز ەتۋگە كومەك كورسەتەدى. ولاردىڭ قاتارىندا قوعامدىق كەڭەستەر، كاسىپورىندارمەن مەكەمەلەردىڭ قىزمەتكەرلەرىنەن قۇرىلعان وتريادتار، ستۋدەنتتەر جاساعى، كونسەرجدەر جانە حالىقتى جۇمىسپەن قامتاماسىز ەتۋ ورتالىعىنىڭ قوعامدىق كومەكشىلەر جاساعى، ىشكى ىستەر ورگاندارىنىڭ ارداگەرلەرى بار. سونىمەن قاتار، جەرگىلىكتى پوليتسيا قىزمەتى باسقارماسىنىڭ قىزمەتكەرلەرىنە ۇكىمەتتىك ەمەس ۇيىمداردىڭ، جەكە كۇزەت قۇرىلىمدارىنىڭ قىزمەتكەرلەرى، پيك قىزمەتكەرلەرى دە كومەك كورسەتەدى.

نۇر-سۇلتان قالاسى پ د باستىعىنىڭ ءبىرىنشى ورىنباسارى باقىتجان مالىبايەۆتىڭ ايتۋىنشا، جىل باسىنان 500 گە جۋىق قوعامدىق كومەكشى اقشالاي سىياقىمەن ماراپاتتالدى.

«بىزدە ەرەكشە كوزگە تۇسكەن، ياعني قۇقىقبۇزۋشىلىقتاردىڭ جولىن كەسۋمەن قاتار قىلمىستاردى اشۋعا دا كومەگىن تيگىزگەن، سونداي-اق، قۇقىقتىق ءتارتىپتى نىعايتۋعا جاردەمدەسىپ، پوليتسيا قىزمەتكەرلەرىنىڭ وڭاي ەمەس جۇمىسىنا ءوز ۇلەستەرىن قوسقان ازاماتتارعا اقشالاي سىياقى بەرۋ قارالعان. جىل باسىنان بەرى ءبىزدىڭ 500 گە جۋىق قوعامدىق كومەكشىلەرىمىز 10 ميلليون تەڭگەدەن استام اقشالاي سىياقىمەن ماراپاتتالدى، بۇعان قوسا ماداقتاما قاعازدارى، باعالى سىيلىقتار جانە العىس حاتتارمەن ماراپاتتاۋ كوزدەلگەن»، - دەدى ول.

قوعامدىق كومەكشىلەردىڭ بەرگەن اقپاراتتارىنىڭ كومەگىمەن اعىمداعى جىلى 8 قىلمىس اشىلىپ، 2000 عا جۋىق اكىمشىلىك قۇقىقبۇزۋشىلىق انىقتالدى.

2019 -جىلدىڭ ءتورتىنشى توقسانىنىڭ قورىتىندىسى بويىنشا 105 قوعامدىق كومەكشى جالپى سانى 2,5 ميلليون استام اقشالاي سىياقىعا يە بولدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى