ۇلتتىق بانك وكىلدەرى جاڭا شىققان 500 تەڭگەنىڭ ەرەكشەلىكتەرى تۋرالى ايتتى
اتالمىش كۋپيۋرانى دايىنداۋمەن ۇلتتىق بانكتىڭ ديزاينەرلەر توبى اينالىسقان. ۇلتتىق ۆاليۋتانىڭ بانكنوتتارىن جاساۋ تەحنيكالىق جاعىنان العاندا كۇردەلى پروتسەس. ونى جاساۋعا قولدانىلاتىن تەحنولوگيالار مەن باسپا تاسىلدەرى جانە قورعانىس ەلەمەنتتەرىنە بايلانىستى 1 دەن 3 جىلعا دەيىنگى ارىلىقتا ۋاقىت كەتەدى. جاڭا شىققان كۋپيۋرا اينالىمعا 22- قاراشادا ەنگىزىلدى.
اقشانىڭ ديزاينىنا قاتىستى كەيبىر ازاماتتارىمىزدان ءتۇرلى ساۋالدار دا تۋىندادى. قازاقستاندىقتار الەۋمەتتىك جەلىدە بانكنوتتىڭ سىرتىنداعى شاعالانىڭ سۋرەتى «ۆيكيپەديا» ەلەكتروندى ەنتسيكلوپەدياسىنداعى قۇسقا ۇقسايتىنىن ايتتى.
«جاڭا بانكنوتتاعى شاعالانىڭ سۋرەتى اتالمىش قۇستىڭ تانىمالدىعىمەن بايلانىستى پايدالانىلدى. شاعالانىڭ جاڭا 500 تەڭگەلىكتە تۇرعان سۋرەتى بارلىق قاناتتىلارعا ءتان جانە مۇنداي كورىنىستەردى كوپتەپ كەزدەستىرۋگە بولادى»، دەپ ءتۇسىندىردى ۇلتتىق بانك وكىلدەرى.
سونىمەن قاتار ولار بانكنوتقا سالىنعان بەينەلەردىڭ بارلىعىن ديزاينەرلەر قانداي دا ءبىر گرافيكالىق رەداكتورلاردى قولدانباستان، تازا قولمەن سالاتىندىعىن ايتتى. بۇل ءوندىرىس بارىسىنداعى مىندەتتى ءارى اسا قاجەتتى ۇدەرىس. سونداي-اق ونىڭ وزگە بەلگىلەرى دە تازا قولمەن جاسالادى.
«500 تەڭگەلىك جاڭا بانكنوت 2006-جىلى شىققان 500 تەڭگەنىڭ نەگىزگى دەتالدارىن ساقتاپ قالدى. ولار: اقشانىڭ كولەمى، ءتۇسى، باستى سيۋجەت - كاسپي تەڭىزى مەن ونداعى شاعالالار. ۇلتتىق ۆاليۋتا بانكنوتىنىڭ ديزاينى، ونىڭ شىعارىلۋى مەن اينالىمعا ەنگىزىلۋى ق ر ۇلتتىق بانكى تاراپىنان بەكىتىلەدى»، - دەدى قارجى رەتتەۋشى ۇيىم قىزمەتكەرلەرى.
«500 تەڭگەلىك بانكنوتتىڭ ديزاينى 2006-جىلدان بەرى وزگەرمەگەن. ال بۇگىنگى كۇنگە دەيىن باسپا جانە كومپيۋتەرلىك تەحنولوگيالار ايتارلىقتاي جەتىلىپ، قالىڭ كوپشىلىك ونى كەڭىنەن پايدالاناتىن جاعدايعا جەتتى. وسى ورايدا ق ر ۇلتتىق بانكى دە ۇلتتىق ۆاليۋتانى جالعان اقشا جاساۋشىلاردان قورعاۋ ءۇشىن بانكنوتتاردىڭ قورعانىس قاسيەتىن نىعايتۋدا جوسپارلى جۇمىس جۇرگىزىپ كەلەدى. بانكنوتتاردىڭ ۋاقىت وتە وزگەرىسكە ۇشىراۋى دا وسىعان بايلانىستى. «بايتەرەك» سەرياسىنداعى اقشالاردىڭ بىرتە-بىرتە 2011-جىلدان بەرى شىعارىلا باستاعان «قازاق ەلى» بانكنوتتارىنا الماستىرىلۋدا. جاڭا 500 تەڭگەلىكتىڭ شىعۋى وسى باعىتتاعى جۇمىستاردىڭ جالعاسى»، - دەدى ۇلتتىق بانك وكىلدەرى.
جالپى، «قازاق ەلى» سەرياسىنداعى بانكنوتتاردىڭ بارلىعىندا بەيبىتشىلىكتىڭ نىشانى ىسپەتتەس - كوگەرشىندەر بەينەلەنگەن. شاعالالاردىڭ بەينەسى سونداي-اق قازاقستان استاناسىنداعى «بەيبىتشىلىك پەن كەلىسىم سارايى»، «حان شاتىر»، «استانا ارەنا»، «تريۋمفالدى اركا» سياقتى عيماراتتاردا دا كەڭىنەن قولدانىلعان. 2017-جىلى شىققان 500 تەڭگەلىك بانكنوتتىڭ بەتىندە «قازاق ەلى» مونۋمەنتى مەن ق ر پارلامەنتى سەناتىنىڭ، تاۋەلسىزدىك سارايىنىڭ، «سارىارقا» ۆەلوترەگى، «ماسكەۋ» بيزنەس-ورتالىعىنىڭ عيماراتتارى كورىنىس تاپقان.
«جاڭا اقشادا بەينەلەتىن نىساندار - ديزاينەرلەردىڭ تاڭداۋى. ولار بۇل ماسەلەگە شىعارماشىلىق تۇرعىدان قارايدى، ياعني، ديزاينەر باكنوتتاعى بەينەلەردىڭ وزگە بەلگىلەرمەن قالاي ۇندەسەتىندىگىنە نازار اۋدارادى»، - دەدى ۇلتتىق بانكتەگىلەر.
ال، كەلەسى كەزەكتە قانداي بانكنوتتىڭ جاڭاراتىندىعى جانە ونداعى بەلگىلەر لاتىن الىپبيىندە جازىلۋى مۇمكىن با دەگەن ساۋالعا بانك قىزمەتكەرلەرى - بانكنوتتاعى جازۋلار مەن ۇلتتىق ۆاليۋتاداعى شاقالاردىڭ بەينەلەرىن وزگەرتۋ جۇمىستارى قر پرەزيدەنتىنىڭ 2017-جىلدىڭ 26 قازانىنداعى «قازاق ءتىلى ءالىپبيىن كيريليتسادان لاتىن گرافيكاسىنا كوشىرۋ تۋرالى» 569№ جارلىعىنا سايكەس جۇرگىزىلەتىندىگىن ايتتى.
