بيۋدجەت كىرىسى 500 ميلليارد تەڭگەگە ارتىق بولادى دەپ كۇتىلۋدە

 بۇل تۋرالى بۇگىن ق ر ۇلتتىق ەكونوميكا ءمينيسترى تيمۋر سۇلەيمەنوۆ «2017-2019 -جىلدارعا ارنالعان رەسپۋبليكالىق بيۋدجەت تۋرالى» زاڭدى تانىستىرۋ كەزىندە ءمالىم ەتتى، دەپ حابارلايدى قازاقپارات.

«رەسپۋبليكالىق بيۋدجەتتىڭ كىرىسى 2017 -جىلى 4 تريلليون 891 ميلليارد تەڭگە بولادى دەپ جوسپارلانىپ وتىر، بۇل بۇنىڭ الدىندا بەكىتىلگەن جوسپاردان 554 ميلليارد تەڭگەگە كوپ»، - دەدى ول.

ونىڭ سوزىنشە، نەگىزگى ءتۇسىم كورپوراتيۆتى كىرىس سالىعىنان (136,3 ميلليارد تەڭگە)، قوسىمشا قۇن سالىعىنان (132,5 ميلليارد تەڭگە) جانە مۇنايدىڭ ەكسپورتتىق كەدەن سالىعىنان (185,3 ميلليارد تەڭگە) تۇسەدى دەپ كۇتىلۋدە.

ءمينيستردىڭ مالىمەتتەرى بويىنشا، ۇلتتىق قوردان باعىتتالاتىن ماقساتتى ترانسفەر 1 تريلليون 092,9 ميلليارد تەڭگەدەن 1 تريلليون 534,6 ميلليارد تەڭگەگە، بيۋدجەت تاپشىلىعى 969,8 ميلليارد تەڭگەدەن 1 تريلليون 547,9 ميلليارد تەڭگەگە دەيىن ارتادى.

«ۇلتتىق قوردان باعىتتالاتىن ماقساتتى كەپىلدەندىرىلگەن ترانسفەرت 2 تريلليون 880 ميلليارد تەڭگە كولەمىندە ساقتالادى. وسىنى قوسا العاندا، رەسپۋبليكالىق بيۋدجەتتىڭ 2017 -جىلعى شىعىسى 11 تريلليون 176,4 ميلليارد تەڭگە دەپ بەلگىلەندى»، - دەدى سۇلەيمەنوۆ.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى