بيىل قاشاعاننان 500 مىڭ توننا مۇناي وندىرىلەدى - ق. بيشىمبايەۆ
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ۇلتتىق ەكونوميكا ءمينيسترى قۋاندىق بيشىمبايەۆ ءمالىم ەتتى.
«مۇناي سالاسىن قولداۋ بويىنشا كوزدەلگەن شارالاردىڭ ناتيجەسىندە مۇناي ءوندىرۋ كولەمىنىڭ جوسپارى 74 ميلليون توننادان 75 ميلليون تونناعا دەيىن جەتكىزىلەدى. سونىمەن قاتار قاشاعاننان مۇناي ءوندىرۋدى 2016-جىلدىڭ قازانىندا باستاۋدى قامتاماسىز ەتۋ بويىنشا شارالار قابىلدانادى. بۇل اعىمداعى جىلى قوسىمشا 500 مىڭ توننا مۇناي ءوندىرۋدى قامتاماسىز ەتۋگە مۇمكىندىك بەرەتىن بولادى»، - دەدى ول.
سونىمەن قاتار ءمينيستردىڭ اتاپ وتۋىنشە، مۇناي وڭدەۋ زاۋىتتارىنىڭ جوسپارلى جوندەۋ مەرزىمدەرى وڭتايلاندىرىلادى. بۇل قوسىمشا 150 مىڭ توننا مۇناي وڭدەۋگە مۇمكىندىك بەرەدى.
«كومىر ءوندىرۋدى ۇلعايتۋ ءۇشىن اعىمداعى جىلدىڭ سوڭىنا دەيىن ەنەرگيا نىساندارىندا وتىننىڭ نورماتيۆتىك قورلارىن قالىپتاستىرۋ بويىنشا باقىلاۋ كۇشەيتىلەدى»، - دەدى ق. بيشىمبايەۆ.
اۆتور: مارلان جيەمباي
