قىتاي ەلىمىزدەن 500 مىڭ قوي- ەشكى ساتىپ الۋدى كوزدەيدى
«قازاقستان مەن قىتاي اراسىنداعى قارىم- قاتىناس بولاشاقتا دا قارقىندى دامي تۇسپەك. ماسەلەن، نۇرسۇلتان نازاربايەۆ پەن شي جينپيڭ ەكىجاقتى كەزدەسۋ بارىسىندا 52 جوباعا قول قويعان بولاتىن. كەلىسىم بويىنشا وندا اۋىل شارۋاشىلىعى، ءبىلىم، عىلىم سالاسىنا، بالامالى ەنەرگيا كوزدەرىنە باسىمدىق بەرىلگەن»، دەلىنگەن حابارلامادا.
قىتاي تاراپى قازاقستانعا اۋا رايىن بولجاۋ، اۋىل شارۋاشىلىعى سەكىلدى سالالارعا ۇشقىشسىز باسقارىلاتىن ۇشاقتاردى جەتكىزىپ بەرەدى. ال ەكى ەلدىڭ تاۋار اينالىمى وتكەن جىلى 1,5 ميلليارد دوللارعا جەتكەن. سونداي- اق، قىتاي شاڭحاي ىنتىماقتاستىعى ۇيىمى شەڭبەرىندە ەركىن ساۋدا ايماعىن قۇرۋدى ۇسىنىپ وتىر. بۇدان باسقا، التاي ايماعىنداعى كورشى ەلدەرمەن دە ءوزارا ارىپتەستىك قۇرۋ جوسپارى بار. بۇل تۋرالى قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى جاڭ حانحۇي وتاندىق ب ا ق وكىلدەرىمەن كەزدەسۋى بارىسىندا ايتىپ بەردى.
«التايدىڭ ار جاق، بەر جاعىندا دا قازاقتار تۇرادى. سوندىقتان ءتورت ەلدىڭ، قازاقستان، قىتاي، رەسەي، موڭعوليانىڭ قاتىسۋىمەن ايماقتىق ارىپتەستىك قۇرامىز. بۇل قاتىسۋشى ەلدەردىڭ ەكونوميكاسىنىڭ دامۋىنا تىڭ سەرپىن بەرەدى. ءارى جاڭا جىبەك جولىنىڭ تۇيىسۋىنە دە سەپتىگىن تيگىزەدى. ەركىن ساۋدا ايماعىن قۇرامىز. مۇنان بولەك، قازاقستاننىڭ تابيعي تازا ونىمىنە قىزىققان قىتاي ءتىپتى 500 مىڭ باس ۋاق مالدى تىرىدەي ساتىپ الۋدى جوسپارلاپ وتىر»، دەيدى ق ح ر- دىڭ قازاقستانداعى توتەنشە جانە وكىلەتتى ەلشىسى جاڭ حانحۇي.
ەلشى مىرزانىڭ ايتۋىنشا، قىتايدىڭ سولتۇستىگىندە مۇسىلماندار كوپ تۇرادى. سوندىقتان، ولاردىڭ ءدىنىن، سالتىن قۇرمەتتەگەندىكتەن جانۋارلاردى وسىلاي الدىرتپاقشى ەكەن. ال ەگەر بۇل جوسپار جۇزەگە اسپاسا، ورتاق مال شارۋاشىلىعىن قۇرۋعا دايىن ەكەندىكتەرىن جەتكىزدى.
