م. ماقاتايەۆتىڭ شىعارماشىلىعىنا ارنالعان رەسپۋبليكالىق بايقاۋدا 500 دەن استام ۇمىتكەر باقتارىن سىنايدى

ول بەس كۇنگە سوزىلادى.

بايقاۋدىڭ ۇيىمداستىرۋشىسى، «عۇمىرداريا» بالالار مەن جاستار ورتالىعىنىڭ جەتەكشىسى ايمان توقتاربەك قىزىنىڭ ايتۋىنشا، وعان قاتىسۋعا ەلىمىزدىڭ تۇكپىر-تۇكپىرىنەن 500 دەن اسا مەكتەپ وقۋشىلارى كەلگەن.

ولار ءتورت اتالىم بويىنشا باقتارىن سىنايدى. ياعني، مۇقاعالي اقىننىڭ ولەڭدەرىن، پوەمالارىن مانەرلەپ جاتقا وقيدى، ولەڭدەرىنە جازىلعان اندەردى ورىندايدى، سول اندەرگە ارنالعان بيلەردى بيلەيدى جانە ولەڭدەرىنە جازىلعان اندەردى دومبىرامەن شىرقايدى.

«ءار اتالىمنىڭ بەس ادامنان تۇراتىن ءوز قازىلار القاسى بولادى. ولاردىڭ قۇرامىنا بەلگىلى مادەنيەتتانۋشى مامانداردى، اقىنداردى، انشىلەردى شاقىرىپ وتىرمىز. بايقاۋعا 6 جاستان 17 جاسقا دەيىنگى مەكتەپ وقۋشىلارى قاتىسۋدا. ولار كىشى توپ (6-9 جاس ارالىعى)، ورتا توپ (10-13 جاس ارالىعى) جانە جوعارى توپقا (14-17 جاس ارالىعى) بولىنگەن. ءاربىر توپ بويىنشا باس جۇلدە جانە جۇلدەلى ءبىرىنشى، ەكىنشى جانە ءۇشىنشى ورىندار بەلگىلەنگەن. جەڭىمپازدارعا باعالى سىيلىقتارمەن قاتار، مۇقاعالي اقىننىڭ جىر جيناقتارى، سۋرەتتەرى سىيعا تارتىلادى»، - دەدى ايمان توقتاربەك قىزى.

ايتا كەتەلىك، بايقاۋ بيىل وسىمەن جەتىنشى رەت وتكىزىلۋدە. وعان اسىرەسە، اۋىل مەكتەپتەرى وقۋشىلارىنىڭ قىزىعۋشىلىعى وتە جوعارى بولۋدا.

«ويتكەنى ولاردىڭ ءتىلى جاتىق، قازاق تىلىندە مەيلىنشە تازا سويلەيدى. سوندىقتان ولارعا ولەڭ وقۋ، ءان شىرقاۋ ەداۋىر وڭايعا تۇسەدى»، - دەيدى ۇيىمداستىرۋشىلار.

الداعى جىلى ۇيىمداستىرۋشىلار بايقاۋ جەڭىمپازدارىن مۇقاعالي اقىننىڭ تۋىپ- وسكەن جەرىنە ساياحات جاساتىپ قايتپاق نيەتتە. بۇگىنگى بايقاۋ الداعى جۇما كۇنگە دەيىن جالعاسادى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى