كوپبالالى وتباسى بالالارىنا ارنالعان 5000 گرانت قالاي بەرىلەدى؟
بۇل تۋرالى بۇگىن ۇكىمەت وتىرىسىندا ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«5000 گرانت كوپبالالى جانە الەۋمەتتىك كومەك الاتىن وتباسىدان شىققان بالالارعا تاعايىندالادى. گرانت قاراجاتى ترانسفەرت ارقىلى جەرگىلىكتى اكىمدىكتەرگە بەرىلەدى. ولار وزدەرىنىڭ قاجەتتىلىگىن ەسكەرە وتىرىپ، ناقتى ماماندىقتار تىزبەسىن انىقتاپ، كونكۋرستىق كوميسسيا قۇرىپ، كونكۋرس جۇرگىزىپ، گرانت بەرەدى. جالپى، بۇل تەتىك بۇگىنگى كۇنى بار، زاڭناماعا ەنگىزىلگەن»، - دەدى مينيستر.
ونىڭ ايتۋىنشا، كونكۋرسقا قاتىسۋ ءۇشىن تالاپكەر نىسانالى توپقا جاتقانىمەن قاتار، ۇلتتىق ءبىرىڭعاي تەستىنىڭ شەكتى باللىن جيناۋى قاجەت.
«جالپى، وسى گرانتقا يە بولۋ ءۇشىن ۇمىتكەرلەر ەڭ الدىمەن جىلداعىداي نەگىزگى 53785 گرانتقا رەسپۋبليكالىق كونكۋرسقا 21-31- شىلدە ارالىعىندا قاتىسىپ، باعىن سىنايدى. سول جالپى كونكۋرس بويىنشا گرانتقا يە بولماعان كوپبالالى وتباسىدان شىققان جانە اتاۋلى كومەك الۋشىلار ساناتىنداعى تالاپكەرلەر قوسىمشا بەرىلگەن 5 مىڭ گرانتقا نىسانالى گرانتتار الۋ ءۇشىن تامىزدىڭ 5-10 ارالىعىنداعى كەلەسى كونكۋرسقا تاپسىرۋ ءۇشىن جەرگىلىكتى اتقارۋشى ورگاندارعا ءوتىنىش بەرە الادى. بۇل ارادا اكىمدىكتەر گرانتتاردى ۇ ب ت بالىنا جانە گرانت سانىنا قاراي تاعايىندايدى جانە جەڭىمپازداردىڭ ءتىزىمىن جەرگىلىكتى ب ا ق- تا جاريالايدى. بارلىق نىسانالى گرانت يەگەرلەرىنە ادەتتەگىدەي 20949 تەڭگە كولەمىندە شاكىرتاقى تاعايىندالادى. سونىمەن قاتار، دەمالىس كەزىندە جىلىنا 2 رەت جول وتەماقىسى وتەلەدى»، - دەدى اسحات ايماعامبەتوۆ.
