ساكەن مايعازيەۆ: ميلليونەرلەر شەتەل انشىسىنە 50 مىڭ دوللار بەرىپ، قازاققا 5 مىڭ دوللارىن قيمايدى
ءانشى ەلى مەن جەرى ءۇشىن قانىن توگىپ، جانىن بەرگەن اتا- بابالارىمىزدىڭ ەڭبەگىن ۇمىتىپ، تايراڭداپ جۇرگەن جانداردى كورگەندە قىنجىلاتىنىن ايتتى.
بۇل تۋرالى مايعازيەۆ «جۇلدىز» ارناسىنا، مارال ساتقانعاليەۆانىڭ اۆتورلىق باعدارلاماسىنا بەرگەن سۇحباتىندا ايتتى، دەپ جازادى Stan.kz.
«وزگەنىڭ قاڭسىعىن تاڭسىق قىلىپ دەگەن ءسوز بار. بىرەۋدىڭ قالدىرىپ، شايناپ تاستاپ كەتكەن دۇنيەسىن تاڭسىپ قىلىپ جاتقاندايمىز. تاڭعالامىن، كىشكەنتاي ەركەتوتايى ءۇشىن ايدالادان شەتەلدەن انشىلەردى الدىرىپ، 40-50 مىڭ دوللارلاپ شاشىپ جاتقان مىقتى- مىقتى ميلليونەرلەر، قالتالى ازاماتتار بار. ول ءانشىسى القىنىپ، تارتىنىپ قانشاما اداممەن كەلەدى. نەگە قازاقتىڭ ازاماتتارىن كوتەرمەيدى، نەگە كومەكتەسپەيدى؟ سوندا تاۋەلسىزدىكتى وسىلاردىڭ تايراڭداپ ءجۇرۋى ءۇشىن الدى ما، دەگەن ماسەلە مەنى دە ويلاندىرماي قويمايدى»، - دەپ باستادى ءسوزىن ساكەن مايعازيەۆ.
ءانشى وزگەنىڭ دۇنيەسىن قىزعانبايتىنىن اتاپ ءوتتى. الايدا ەل ەكونوميكاسى دامىماي جاتىپ، وزگە ەلگە شاشىلاتىن ازاماتتاردى تۇسىنبەيتىنىن العا تارتتى.
«بايدىڭ مالىن بيشارا قىزعانىپتى» دەيدى. بىرەۋدىڭ مالىن قىزعانعانىم ەمەس. جالپى ءوزىمىزدىڭ بيۋدجەتىمىزدى دامىتا الماي، قالتامىزدى قامپايتا الماي جاتقان كەزدە ايدالاعا شاشىلاتىنىمىز- اي... سول 50-60 مىڭ دوللار سۇراپ جاتقان شەتەل ءانشىسىنىڭ ورنىنا قازاقتىڭ ءبىر انشىسىنە 4-5 مىڭ دوللار بەرشى دەسەڭ جىلاپ جىبەرەدى. بولماسا جەتىم- جەسىرگە نە مۇقتاج جانعا پاتەراقىسىن تولەۋگە 400 دوللار بەرە الاسىڭ با دەسەڭ، زار قاقسايدى. ال ءبىراق كازينوعا، شەتەلگە تۇستەنىپ كەلۋگە ۇشىپ بارىپ جۇرگەن ادامداردى كورگەندە، قاي اتا- باباسىنان كەلگەن داۋلەت ەدى وسىنشالىقتى ىسىراپ جاسايتىنداي دەپ ويلايمىن. ىسىراپتى وتە كوپ پايدالانىمىز. كۇنى- ءتۇنى اراق ءىشىپ، كازينو ويناپ جۇرگەن ادامداردى كورگەن كەزدە، شىركىن بابالارىم- اي دەپ جىلاعىم كەلەدى»، - دەيدى مايعازيەۆ.
بۇدان بولەك، مايعازيەۆ رۋحاني تاقىرىپتا ءسوز قوزعاساڭ ءۇنسىز قالاتىن، ءبىراق داۋ- داماي مەن وسەك- اڭگىمەگە كەلگەندە الدىنا جان سالمايتىن جاندار تۋرالى ايتتى.
«جەلتوقسانشىلارىمىزعا اللا رازى بولسىن، مەيىرىمىنە بولەسىن. قانشاما قازاقتىڭ ۇل- قىزدارى قاقاعان قىستا الاڭعا شىعىپ، قانشاما قىزدارىمىز جاپا شەكتى، ۇلدارىمىز قورلىق كوردى. سونى باعالاماي جاتقان سياقتىمىز. مىسالى، الەۋمەتتىك جەلىگە وتان تۋرالى، پاتريوتيزم تۋرالى بىردەڭە جازساڭ، پىكىر وتە از. ال شوۋ- بيزنەستە جۇرگەن ءبىر قارىنداسىمىزبەن سۋرەتكە تۇسە قالشى، 500 گە دەيىن پىكىر كەتەدى. سوندا ءبىزدىڭ وي- ءورىسىمىزدىڭ سونشا ءتۇسىپ كەتكەنى مە؟ » - دەپ نازىن ءبىلدىردى ساكەن مايعازيەۆ.
