5 ميلليون تەڭگە شىعىن كەلتىرگەن: الماتى وبلىسىندا مال ۇرلىعىمەن اينالىسقاندار ۇستالدى
استانا. KAZINFORM - جامبىل اۋدانىندا پوليسيا قىزمەتكەرلەرى مال ۇرلىعىمەن اينالىسقان قىلمىستىق توپتى ۇستادى، - دەپ حابارلايدى Polisia.kz.
22-اقپاندا ۇزىناعاش اۋىلىنىڭ تۇرعىنى پوليسياعا شارۋا قوجالىعىنىڭ قوراسىنان 5 جىلقىسىنىڭ ۇرلانعانى تۋرالى ارىزداندى. بەيمالىم ادامدار جابىرلەنۋشىگە 5 ميلليون تەڭگە كولەمىندە شىعىن كەلتىرگەن.
- جەدەل-ىزدەستىرۋ شارالارى بارىسىندا پوليتسيا قىزمەتكەرلەرى 32 جانە 34 جاستاعى ەكى كۇدىكتىنى ۇستاپ، قاماۋعا الدى. ۇرلانعان مال تابىلىپ، زاڭدى يەسىنە قايتارىلدى، - دەپ مالىمدەدى پوليسيا وكىلدەرى.
اتالعان فاكتى بويىنشا قىلمىستىق ءىس قوزعالدى. قازىرگى ۋاقىتتا قۇقىق قورعاۋ ورگاندارى ۇستالعانداردىڭ باسقا دا وسىعان ۇقساس قىلمىستارعا قاتىسى بار- جوعىن تەكسەرىپ جاتىر.
ايتا كەتەيىك، جىل باسىنان بەرى جامبىل اۋدانىنىڭ پوليسيا قىزمەتكەرلەرى مال ۇرلىعىمەن اينالىسقان ءۇش قىلمىستىق توپتىڭ ارەكەتىنە توسقاۋىل قويدى.
