گەرمانيا كومپانيالارى الداعى 5 جىلدا قازاقستانداعى 60 جاڭا جوباعا قارجى قۇيۋعا نيەت تانىتىپ وتىر
وسىعان وراي «ەگەمەن قازاقستان» گازەتى وتىرىسقا قاتىسقان قازاقستانداعى ءبىرقاتار شەتەلدىك كومپانيالار باسشىلارى مەن ينۆەستورلاردىڭ، سونداي- اق، ينۆەستيتسيانى قاجەتسىنەتىن قازاقستاندىق ىسكەرلەر لەبىزىن جاريالادى. سولاردىڭ ءبىرى - «دويچە بانك» اتقارۋشى ديرەكتورى پيتەر تيلس.
«گەرمانيا بيزنەسمەندەرى قازاقستانداعى ۇدەمەلى يندۋستريالىق- يننوۆاتسيالىق دامۋ باعدارلاماسىنا ەلەۋلى ۇلەس قوسىپ كەلەدى. ماسەلەن، ءبىزدىڭ ەل كومپانيالارىنىڭ 12 ءىرى وندىرىستىك جوبا شەڭبەرىندە قازاقستانعا سالعان تىكەلەي ينۆەستيتسيالارى 2 ميلليارد دوللاردان اسىپ وتىر. ەندى بۇل كورسەتكىشتى ودان دا ارتتىرا تۇسەتىندىگىمىز انىق. ويتكەنى، وسى وتكەن وتىرىس بارىسىندا ءبىز قازاقستانعا كەلەتىن ينۆەستيتسيالار كولەمىن ارتتىرۋ ءۇشىن ينۆەستورلارعا قوسىمشا جەڭىلدىكتەر جاسالاتىندىعىن بىلدىك.
ارينە، ول جەڭىلدىكتەردىڭ اراسىندا كورپوراتيۆتىك تابىس سالىعىن، جەر سالىعىن، مۇلىك سالىعىن تولەۋدەن بوساتۋدىڭ ءمانى ەرەكشە. سونىمەن قاتار، ءبىزدى مەملەكەتتىڭ نىساندى پايدالانۋعا بەرگەننەن كەيىن شەتەلدىك ينۆەستورلارعا كۇردەلى شىعىستارىنىڭ 30 پايىزىنا دەيىن وتەپ بەرەتىندىگى قۋاندىردى. ونەركاسىپ سالاسىنداعى ينۆەستورلار ءۇشىن بۇل جەڭىلدىكتىڭ دە ۇلكەن ءمانى بار. سونىمەن قاتار، بانكتەردى دە ىنتالاندىرا تۇسەتىندىگى ايقىن. ويتكەنى، ونەركاسىپشىلەر ءبىزدىڭ نەسيەلەرىمىزدى مولىنان پايدالانىپ قالۋعا ۇمتىلادى.
وسىنداي جاعدايلاردى ەسكەرە كەلىپ، گەرمانيا كومپانيالارى الداعى 5 جىلدا تاعى دا 60 جاڭا جوباعا ينۆەستيتسيا سالۋعا نيەت تانىتىپ وتىر. ياعني، وسى ارقىلى ءبىزدىڭ ينۆەستيتسيالارىمىزدىڭ كولەمى 3,5 ميلليارد دوللارعا دەيىن جەتەتىن بولادى. ءبىز بۇگىن ءىس بارىسىندا قازاقستانداعى يندۋستريالاندىرۋ باعدارلاماسىن جۇزەگە اسىرۋدىڭ جوسپارلارىمەن تانىستىق. بۇل جوسپارلار شىندىققا سايكەس جانە ءورشىل ماقساتتاردى كوزدەيدى. سوندىقتان، قازاقستاننىڭ العا قويىپ وتىرعان ماقساتتارى مەن وعان جەتۋ ءۇشىن جاساعان قادامدارى ءبىزدى قاناتتاندىرىپ تاستادى. ءبىز قازاقستانمەن ارىپتەستىك قارىم- قاتىناستاردى ودان ءارى نىعايتۋعا مۇددەلىلىك تانىتۋدامىز» ، - دەيدى «دويچە بانك» اتقارۋشى ديرەكتورى.
