الماتىلىقتاردىڭ ءومىر ءسۇرۋ ۇزاقتىعى 5,5 جىلعا ۇزاردى
بۇل تۋرالى دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ ايتتى، دەپ حابارلايدى قازاقپارات ءتىلشىسى.
الماتى مەديتسينالىق قاۋىمداستىعى تۇڭعىش پرەزيدەنت كۇنىنە وراي جيىن وتكىزدى. سالتاناتتى جيىندا قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قىزمەتكەرلەردى قۇتتىقتاپ ءسوز سويلەدى.
باسقارما باسشىسى اتاپ وتكەندەي، قازاقستاننىڭ دەنساۋلىق ساقتاۋ سالاسىنداعى وڭ ديناميكا الماتىداعى وزگەرىستەردەن-اق كورىنىس بەرەدى.
«سوڭعى 10 جىلدا ءبىر تۇرعىننىڭ دەنساۋلىعىنا بولىنەتىن قارجى 3 ەسە، جىلىنا 17081 تەڭگەدەن 55000 تەڭگەگە ارتتى. سونداي-اق، جالپى حالىق دەنساۋلىعىنا جۇمسالاتىن قارجى كولەمى 19 ميلليارد تەڭگەدەن 99,5 ميلليارد تەڭگەگە ۇلعايدى. قالا تۇرعىندارىنىڭ ورتاشا ءومىر ءسۇرۋ ۇزاقتىعى 5,5 جىلعا 70,43 جاستان 75,9 جاسقا جەتتى»، - دەدى سەرىكبول مۋسينوۆ.
ناۋقاستاردى امبۋلاتوريالىق ەمدەۋگە بولىنەتىن قارجى 4,3 ەسە ءوستى. مەديتسينالىق ۇيىمداردىڭ ماتەريالدى تەحنيكالىق قامتىلۋىنا - 27,5 ميلليارد تەڭگە، كۇردەلى جوندەۋ جۇمىستارىنا 9 ميلليارد تەڭگە جۇمسالدى. مەديتسينالىق جۇمىسكەرلەردىڭ جالاقىسى 1,4 ەسە ارتقان.
باسقارما باسشىسىنىڭ سوزىنە قاراعاندا، اتقارىلعان جۇمىستاردىڭ ناتيجەسىندە دەنساۋلىق ساقتاۋ سالاسىنىڭ باستى ينديكاتورلارى جاقساردى. الماتىدا تۋۋ كورسەتكىشى 2011 -جىلدان بەرى ءوسىپ كەلەدى. حالىق اراسىنداعى ءولىم كورسەتكىشى 1,5 ەسە ازايدى. انا مەن بالا ءولىمى 2-2,3 ەسە ازايدى.
سونىمەن قاتار، جۇرەك قان تامىرلارى اۋرۋىنان كوز جۇماتىن تۇرعىنداردىڭ سانى 2 ەسە، قاتەرلىك ىسىكتەن - 2 ەسە، جاراقات الىپ ۋلانۋدان 3 ەسە، تۋبەركۋلەزدەن كوز جۇماتىنداردىڭ سانى 3,5 ەسە قىسقاردى.
