بيۋدجەتتىڭ 5,5 ميلليون تەڭگە قارجىسىن جىمقىرعانى ءۇشىن باس ەسەپشى جەتى جىلعا سوتتالدى
ب ق و پروكۋراتۋراسىنىڭ باسپا ءسوز قىزمەتىنەن تۇسكەن مالىمەتكە قاراعاندا، اتالعان دەرەك سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە ق ر ق ك 176-بابى 4- ءبولىمى «ب» تارماعىمەن (1997-جىلعى رەداكسيادا) تىركەلىپ، قۇجاتتار ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ب ق و بويىنشا دەپارتامەنتىنە جولدانعان بولاتىن.
سوتقا دەيىنگى تەرگەپ-تەكسەرۋ بارىسىندا باس ەسەپشى ز. راحمەتوۆانىڭ 2013-2014-جىلدارى كاسىپورىننىڭ «قازپوشتا» ا ق ب ق و فيليالى سىرىم اۋداندىق بولىمشەسىندەگى ەسەپشوتىنان 5490534 تەڭگەنى الۋ جولىمەن يەلەنىپ، ىسىراپ ەتكەنى بەلگىلى بولدى.
سىرىم اۋداندىق سوتىنىڭ ۇكىمىمەن ز. راحمەتوۆا 5 جىل مەرزىمگە ماتەريالدىق جاۋاپتى قىزمەتتى اتقارۋ قۇقىعىنان ايىرىلۋمەن بىرگە 7 جىلعا باس بوستاندىعىنان ايىرىلدى. ز. راحمەتوۆانىڭ تاربيەسىندە ءۇش جاس بالاسىنىڭ بولۋىنا بايلانىستى نەگىزگى جازانى ورىنداۋ ق ر ق ك 74-بابىنا سايكەس 5 جىل مەرزىمگە كەيىنگە قالدىرىلدى.
سونىمەن قاتار ب ق و دەنە شىنىقتىرۋ جانە سپورت باسقارماسى مەن اۋدان پروكۋرورىنىڭ ز. راحمەتوۆادان سايكەسىنشە باسقارما پايداسىنا 5490534 تەڭگە جانە مەملەكەت ەسەبىنە 201980 تەڭگە پروتسەسسۋالدىق شىعىن ءوندىرۋ تۋرالى تالاپ-ارىزدارى قاناعاتتاندىرىلدى.
اۆتور: ەلجان ەرالى
