ۇلىقپان جولداسوۆ: باۋىرجان رەتبايەۆتىڭ 5 ميلليونىنان 5 تيىن دا المايمىن
ايتا كەتەيىك، كۇنى كەشە ۇلىقپان جولداسوۆ پروديۋسەرلىك ەتەتىن «باتىس» توبىنىڭ ءانشىسى باۋىرجان رەتبايەۆ «قازاقستان داۋىسى» جوباسىنىڭ جەڭىمپازى اتانىپ، 5 ميلليون تەڭگەگە يە بولعان بولاتىن.
سونداي-اق «قازاقستان داۋىسى» جوباسى اياقتالعان سوڭ «باتىس» توبىندا وزگەرىستەر ورىن الدى. وعان بىردەن-ءبىر سەبەپ - توپ ءانشىسى باۋىرجان رەتبايەۆتىڭ جەڭىمپاز بولۋى. بۇل جاڭالىقتى توپتىڭ پروديۋسەرى ۇلىقپان جولداسوۆ ايتتى، دەپ حابارلايدى baistars.kz.
باتىس دەگەن اتى ءۇشىن ءبىراز سىنعا ۇشىراعان توپ ەندى « داۋىس. KZ » دەپ اتالادى.
بۇل - ۇلىقپان مىرزانىڭ باۋىرجاننىڭ جەڭىسىنە جانە «قازاقستان داۋىسىنىڭ» قۇرمەتىنە ارنايى دايىنداعان سىيى. سەبەبى توپتاعى ەكى ءانشى دە سول جوبانىڭ قاتىسۋشىلارى. بەردىبەك قۇلعارايەۆ وتكەن جىلعى «قازاقستان داۋىسى» جوباسىندا باق سىناپ، جەڭىسكە ءبىر تابان جاقىن كەلسە، باۋىرجان رەتبايەۆ - بارلىق كورەرمەندى مويىنداتقان بيىلعى جەڭىمپاز. ءبىر قىزىعى، ۇلىقپان جولداسوۆ باۋىرجاننىڭ جەڭۋىنە تىلەكتەس بولعانىمەن، بىردە-ءبىر رەت داۋىس بەرمەپتى.
«داۋىس بەرەم دەسەم، 140 تەڭگەم جوق ەمەس. ءبىراق مەنىڭ قولداۋىمدى ۇلىقپان ءوزىنىڭ بالاسىنا بۇرىپ وتىر دەپ ءتۇسىنۋى مۇمكىن. مەنىڭ ءبىر عانا داۋىسىمنان ەشتەڭە وزگەرىپ كەتپەيدى عوي»، - دەيدى ۇلىقپان جولداسوۆ.
باۋىرجاننىڭ جوبادان بوساپ، توپتىڭ شىعارماشىلىق جۇمىستارىنا تولىقتاي كىرىسۋىن اسىعا كۇتىپ وتىرعان جەتەكشىسى: «كەيبىر كىسىلەر جازىپ جاتتى، باۋىرجانعا قاتتى قولداۋ كورسەتىپ جاتىر، ۇلىقپانعا اقشا كەرەك بولعان شىعار دەپ. ءبىراق مەن ايتا كەتەيىن، جەڭىمپازدىڭ 5 ميلليونىنان 5 تيىن دا المايمىن. ول جۇلدەگە مەنىڭ، داۋىس. KZ توبىنىڭ ەشقانداي قاتىسى جوق، ول - باۋىرجاننىڭ ەڭبەگى. وزىنە كيىم الدە كولىك الادى ما، كوشەگە شاشىپ جىبەرەدى مە، ورتەپ جىبەرەدى مە ءوزى بىلەدى»، - دەدى.
