قازاقستاننىڭ سولتۇستىك وڭىرىندە حالىق سانى ميلليون ادامعا ازايىپ، وڭتۇستىكتە 5,2 ميلليون ادامعا وسەدى

 كەشە ماجىلىستە كوشى- قون ۇدەرىستەرىنە ارنالعان دوڭگەلەك ۇستەل بارىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا وسىلاي مالىمدەدى.

توقتالا كەتەتىن جايت، مينيستر كەلتىرگەن بولجامعا سايكەس، 2030 - جىلعا قاراي قازاقستان حالقىنىڭ سانى 20,3 ميلليون ادامدى قۇرايدى.

«بۇل 20,3 ميلليون ادامنىڭ 52,7 پايىزى 2030 - جىلعا قاراي نەگىزگى بەس وڭىرگە تيەسىلى بولادى. ماسەلەن، الماتى وبلىسىندا - 2,5 ميلليون ادام، جامبىل وبلىسىندا 1, 249 ميلليون ادام، وڭتۇستىك قازاقستان وبلىسىندا - 3 ميلليون 660 مىڭ ادام، استانا مەن الماتى قالالارىندا 3,3 ميلليون ادامدى قۇرايدى. ال وسى كەزەڭ ىشىندە اقمولا، قاراعاندى، قوستاناي، پاۆلودار، سولتۇستىك قازاقستان وبلىستارىندا حالىق سانى كەمي تۇسەدى. ەگەردە، ءبىز كوشى- قونعا قاتىستى ۇدەرىس وزگەرتپەستەن ۇستاپ تۇرساق، وندا وڭتۇستىك وڭىرلەردە تۋۋ ەسەبىنەن حالىق سانى ارتىپ، كەرىسىنشە سولتۇستىك وڭىرلەردە تومەندەي بەرەدى»، - دەدى تامارا دۇيسەنوۆا.

كەلتىرىلگەن مالىمەتتەرگە قاراعاندا، 2050 - جىلعا قاراي ىشكى كوشى- قون سالاسىندا تەڭگەرىمسىزدىكتەر ورىن الۋى ىقتيمال. ماسەلەن، 2050 - جىلعا قاراي سولتۇستىك وڭىرلەردەگى حالىقتىڭ سانى شامامەن ميلليون ادامعا قىسقارسا، كەرىسىنشە وڭتۇستىك وڭىردە بۇل 5,2 ميلليون ادامعا وسەدى. بولجامدى دەرەكتەر بويىنشا وڭتۇستىك وڭىردەگى حالىقتىڭ قونىستانۋ تىعىزدىعى سولتۇستىك وڭىردەن 4 ەسەگە ارتاتىن بولادى.

 «سونىمەن قاتار، وڭتۇستىك وڭىرلەردە (الماتى قالاسىن قوسپاعاندا) حالىقتىڭ 38 پايىزى شوعىرلانسا، سويتە تۇرا ولاردىڭ جالپى ايماقتىق ونىمدەگى ۇلەسى 17 پايىزدى عانا قۇرايدى. ال باتىس وڭىرلەردە حالىقتىڭ 11 پايىزى تۇرىپ، جالپى ايماقتىق ءونىم ۇلەسى 22 پايىزدان اسادى. سولتۇستىك اۋدانداردا حالىقتىڭ 29 پايىزى شوعىرلانىپ، جالپى ايماقتىق ءونىمى 25 پايىزدى قۇراۋى مۇمكىن» ، - دەدى ت. دۇيسەنوۆا. بۇل رەتتە مينيستر وڭتۇستىك وڭىرلەردە ادامداردىڭ باسىم بولىگى ساۋدا جانە باسقا دا قىزمەتتەرگە تارتىلسا، سولتۇستىك اۋماقتاردىڭ ەكونوميكاسى جەتكىلىكتى دەڭگەيدە سارالانعانىن اتاپ ءوتتى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى