قازاقستاندا سوڭعى 5 جىلدا اسىل تۇقىمدى مال باسى 10 ەسەگە ءوستى
بۇل تۋرالى كەشە ق ر پارلامەنتى ءماجىلىسى اگرارلىق ماسەلەلەر جونىندەگى كوميتەتىنىڭ وتىرىسىندا اۋىل شارۋاشىلىعى ءمينيسترى اسىلجان مامىتبەكوۆ ءمالىم ەتتى.
«ەلىمىزدە اسىل تۇقىمدى جانە ەتتى ءىرى قارا مال باسى ءوسىپ جاتىر. ماسەلەن، 2009 - جىلى ەلىمىزدەگى اسىل تۇقىمدى ەتتى مالدىڭ ۇلەسى 1,9 پايىزعا جەتپەسە، بۇگىندە بۇل كورسەتكىش 14,6 پايىزعا ءوسىپ وتىر. ياعني، ءوسىم 10 ەسەنى قۇرايدى» ، - دەدى ول.
ءمينيستردىڭ سوزىنە قاراعاندا، اسىل تۇقىمدى مال باسى يمپورت ەسەبىنەن عانا ەمەس، سونىمەن بىرگە ەل ىشىندە دە مالدىڭ ءوسىپ- ءونۋى ارقىلى كوبەيىپ كەلەدى.
«مۇنىمەن اينالىسۋ ءتيىمدى بولا باستادى. ەگەر، ەرتەرەكتە بىزدەگى ءتىرى مالدىڭ 1 كەلى سالماعى شامامەن 400-500 تەڭگەنى قۇراسا، بۇگىندە اسىل تۇقىمدى مالدىڭ ءتىرى سالماقتاعى 1 كەلىسى 1500 تەڭگەنى قۇرايدى جانە بۇل ءتيىمدى بيزنەسكە اينالىپ وتىر. ادامدار مۇنى ءتۇسىنىپ، اسىل تۇقىمدى مال باسىن قارقىندى وسىرە باستادى» ، - دەدى ا. مامىتبەكوۆ.
