ارنايى جۇيە 4 سۋيتسيدتىڭ الدىن الۋعا مۇمكىندىك بەردى - قورعانىس مينيسترلىگى
بۇل سۇراققا قورعانىس ۆيتسە-ءمينيسترى سۇلتان قامالەتدينوۆ جاۋاپ بەردى، دەپ حابارلايدى قازاقپارات ءتىلشىسى.
«اسكەري مىندەتتى وتەۋ جول جۇرۋدەن قاۋىپتى ەمەس دەپ ويلايمىن. ادامدار قارۋلى كۇشتەر قاتارىنان گورى جول بويىندا ءجيى مەرت بولادى. بالانى اسكەرگە جىبەرۋدەن ۇرەيلەنۋدىڭ قاجەتى جوق. بىزدە قاۋىپسىزدىكتى قامتاماسىز ەتۋ باعىتىندا بىرنەشە باعدارلاما بار. مىسالى، اتا-انالار كوميتەتى بار، ونىڭ وكىلدەرى ساربازداردىڭ جاعدايىمەن تىكەلەي تانىسا الادى. سونداي-اق، «سەرىكتەس» دەگەن جۇيە ىسكە قوسىلعان. ءار ساربازدىڭ ءوز سەرىكتەسى، دوسى بار، ولار ءبىر-ءبىرىن قارايلاپ، باقىلاپ جۇرەدى. اتالعان پراكتيكا 4 سۋيتسيد فاكتىسىنىڭ الدىن الۋعا مۇمكىندىك بەردى»، - دەدى سۇلتان قامالەتدينوۆ ءماجىلىستىڭ كۋلۋارىندا تىلشىلەرگە سۇحبات بەرە تۇرىپ.
ۆيتسە-ءمينيستردىڭ مالىمەتىنشە، ءار جەكە قۇرامدى تاۋلىك بويى قاداعالايتىن بەينەباقىلاۋ كامەرالارى ورناتىلعان.
«ودان بولەك، پسيحولوگتەر جۇمىس ىستەيدى. ولار ساربازدارمەن تۇراقتى تۇردە اڭگىمە-دۇكەن قۇرىپ، ساۋالناما جۇرگىزىپ تۇرادى. وتكەن جىلدان باستاپ ساربازدارعا اتا-اناسىمەن بەينەبايلانىس ارقىلى سويلەسۋگە رۇقسات بەرىلدى. سونىمەن قاتار، كومانديرى چات ارقىلى اتا-انالارمەن تىكەلەي بايلانىستا»، - دەيدى ءمينيستردىڭ ورىنباسارى.
