پەتروپاۆلدا الپينيستىك قۇرالداردىڭ كومەگىمەن 4- قاباتتان سەكىرمەك بولعان ادام قۇتقارىلدى
سولتۇستىك قازاقستان وبلىسى توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، وقىس وقيعا 2-ناۋرىز كۇنى كەشقۇرىم بولدى. ۆەدومستۆونىڭ جەدەل كەزەكشىسىنە حابارلاسقاندار پەتروپاۆلداعى بەرەكە ىقشاماۋدانىنداعى كوپ قاباتتى ۇيلەردىڭ ءبىرىنىڭ 4- قاباتىنان ەر ادامنىڭ سەكىرمەك نيەتتە ەكەندىگىن ايتقان.
جەدەل- قۇتقارۋ وتريادى كەلگەندە جىگىت 4-قاباتتاعى پاتەردىڭ تەرەزە جاقتاۋىندا وتىرعان. قۇتقارۋشىلار، پوليتسەيلەر جانە تۇرعىندار قۇتقارۋ كەنەبىن جايىپ، استىندا تۇردى.
«ول جات قىلىق كورسەتتى، بەتىمەن سويلەپ، تەرەزەدەن سەكىرەمىن دەپ قورقىتتى. بىرەسە جاقتاۋعا ءمىندى، قايتا ءتۇستى. تومەنگى پاتەردە جانە جەردە تۇرعان پوليتسەيلەردىڭ سوزىنە قۇلاق اسپادى. سوندىقتان جىلدام قيمىلداۋ قاجەتتىگىن ءتۇسىندىم. الپينيستىك جابدىقتى الىپ، بەسىنشى قاباتقا كوتەرىلدىك. پاتەر يەلەرى تۇسىنىستىك تانىتىپ، ءبىزدى كىرگىزدى.
مەنىڭ الدىمدا بەسىنشى قاباتتىڭ تەرەزەسىنەن ءتورتىنشى قاباتقا ءتۇسىپ، ىڭعايلى ساتتە تەرەزەدەگى جىگىتتى جىلدام ىشكە يتەرىپ كىرگىزۋ مىندەتى تۇردى. ويىم جۇزەگە اسىپ، ىشكە قۇلاعان جىگىتتى پوليسەيلەر ۇستاپ قالدى»، - دەيدى قۇتقارۋشى ايبول وتاربايەۆ.
ايبول وتاربايەۆ جەدەل- قۇتقارۋ وتريادىندا 8 جىلدان بەرى جۇمىس ىستەيدى. وسى ارالىقتا ول كوپتەگەن قۇتقارۋ وپەراتسياسىنا قاتىستى. كوكتەمگى سۋ تاسقىنىندا تۇرعىنداردى ءقاۋىپسىز جەرگە شىعاردى، جول- كولىك اپاتى كەزىندە قىسىلىپ قالعان ادامداردى، الپينيستىك جابدىقتى قولدانىپ، ۇيدە جالعىز قالىپ قويعان بالالاردى قۇتقاردى.
«كۇندەلىكتى جاتتىعۋلار ارقىلى تاجىريبەمىزدى ۇشتاپ وتىرامىز. جالپى قۇتقارۋ - كوماندالىق جۇمىس، مۇندا توپتاعى ءار ماماننىڭ ەڭبەگى ولشەۋسىز»، - دەيدى ايبول وتاربايەۆ.
