قوعامدىق ورىنداعى بىلاپىت ءسوز ءۇشىن ايىپپۇل 4 ەسەگە ارتتى
بۇل تۋرالى ق ر ءى ءى م اكىمشىلىك پوليتسيا كوميتەتى باسقارما باستىعىنىڭ مىندەتىن اتقارۋشى ازامات قۇرىمبايەۆ مينيسترلىكتىڭ اپتالىق بريفينگىندە ايتتى، دەپ حابارلايدى قازاقپارات.
«اكىمشىلىك قۇقىقبۇزۋشىلىقتار كودەكسىنىڭ جاڭا نۇسقاسىندا «ۇساق بۇزاقىلىق» ۇعىمىنا: قوعامدىق ورىنداردا بالاعات سوزدەر ايتۋ؛ جەكە تۇلعالاردى قورلاۋ جانە ولارعا قىسىم كورسەتۋ؛ عيماراتتارعا، قۇرىلىستارعا، تۇرعىن ءۇي-جايلارعا، ورتاق پايدالانۋ ورىندارىنا، كولىكتەگى جانە قوعامدىق ورىندارداعى مۇلىككە نۇقسان كەلتىرۋ؛ اينالاعا قۇرمەتسىزدىك بىلدىرەتىن، قوعامدىق ءتارتىپ پەن جەكە تۇلعالاردىڭ تىنىشتىعىن بۇزاتىن باسقا دا وسىنداي ارەكەتتەر جاتادى»، - دەدى ا. قۇرىمبايەۆ.
سپيكەردىڭ ايتۋىنشا، قازىرگى ۋاقىتتا سوت ۇساق بۇزاقىلىق جاساعانى ءۇشىن 5 ا ە ك (17250 تەڭگە) مولشەرىندە ايىپپۇل سالادى نەمەسە 15 تاۋلىككە دەيىن قاماۋعا الادى.
ال جاڭا رەداكسيادا ايىپپۇل 20 ا ە ك (69000 تەڭگە) قۇرايدى، قاماۋعا الۋ 5 تەن 30 تاۋلىككە دەيىن ۇزارادى.
«اتالعان تۇزەتۋلەر العاشقى رەسمي جاريالانعاننان كەيىن 60 كۇن وتكەن سوڭ قولدانىسقا ەنگىزىلەدى»، - دەدى ازامات قۇرىمبايەۆ.
بيىل 3- قاڭتاردا ەل پرەزيدەنتى قاسىم-جومارت توقايەۆ «ق ر قىلمىستىق جانە قىلمىستىق ءىس جۇرگىزۋ كودەكستەرىنە ەكولوگيالىق قۇقىقبۇزۋشىلىقتار مەن ۆانداليزم كورىنىستەرى ءۇشىن جاۋاپكەرشىلىكتى كۇشەيتۋ ماسەلەلەرى بويىنشا تولىقتىرۋلار ەنگىزۋ تۋرالى» جانە «ق ر اكىمشىلىك قۇقىق بۇزۋشىلىق تۋرالى كودەكسىنە ەكولوگيالىق قۇقىقبۇزۋشىلىقتار مەن ۆانداليزم كورىنىستەرى ءۇشىن جاۋاپكەرشىلىكتى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
