قىزىلوردا وبلىسىندا كەنە شاعۋ دەرەگى وتكەن جىلدان 4 ەسەگە ارتقان

وبلىس كونگو- قىرىم گەمورراگيالىق قىزباسىنىڭ تابيعي وشاعىندا ورنالاسقان. ايماقتا اتالعان ينفەكتسيانىڭ قوزدىرعىشىن تاسىمالدايتىن يكسودتى كەنەلەردىڭ 16 ءتۇرى مەكەندەيدى.

«بيىل كەنە شاعۋ دەرەگى وتكەن جىلمەن سالىستىرعاندا 4 ەسەگە ارتقان. بىلتىر ول 238 ادامدى قۇراسا، بيىل 964 دەرەكتى قۇراپ وتىر. سونىمەن قاتار كەنەلەردىڭ اراسىندا اۋرۋ قوزدىرعىشىنىڭ انىقتالۋى دا جوعارى. بىلتىر وبلىس بويىنشا 113 ەلدى مەكەن قولايسىز ايماقتار قاتارىنا قوسىلعان، بيىل ولاردىڭ سانى 116 عا جەتتى»، - دەدى قىزىلوردا وبلىستىق سانيتاريالىق- ەپيدەميولوگيالىق باقىلاۋ دەپاراتمەنتىنىڭ باسپا ءسوز حاتشىسى ايمان جاناحايەۆا.

كەنەگە قارسى زالالسىزداندىرۋ جۇمىستارىنىڭ كوكتەمگى كەزەڭى 11-ءساۋىر مەن 14 -ماۋسىم ارالىعىندا جۇرگىزىلدى. قولايسىز ەلدى مەكەندەردەگى سانيتاريالىق قورعانىس ايماقتارى، قورا جايلار، بۋفەرلىك ايماقتار كەنەگە قارسى تۇگەل زالالسىزداندىرىلدى. وڭدەۋ تيىمدىلىگى 98 پايىزدى قۇرادى. كۇزگى كەزەڭى 19-تامىزدا باستالدى، ول 25 -قازانعا دەيىن جۇرگىزىلەدى.

«كونگو- قىرىم گەمورراگيالىق قىزباسىنا 43 كۇدىكتى جاعداي تىركەلدى. ولاردىڭ 15 ءى زەرتحانالىق جولمەن راستالدى. باسىم كوپشىلىگى 30 جاستان اسقان ادامدار اراسىندا انىقتالدى. اتالعان دەرتتەن 4 ادام كوز جۇمدى»- دەپ اتاپ ءوتتى ۆەدومستۆودان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى