قازاقپارات كۇنتىزبەسى: 4- قىركۇيەك
اتاۋلى كۇندەر
حالىقارالىق تحەكۆوندو كۇنى
بۇكىل الەمدىك تحەكۆوندو فەدەراتسياسى 2006-جىلى حوشيميندە (ۆەتنام) وتكەن باس اسسامبلەيادا بەكىتتى.
بۇل داتانىڭ تاڭداپ الىنۋى كەزدەيسوق ەمەس، ويتكەنى 1994-جىلى ءدال وسى 4- قىركۇيەكتە حالىقارالىق وليمپيادا كوميتەتى تحەكۆوندونى وليمپيادالىق سپورت تۇرلەرى قاتارىنا قابىلداعان بولاتىن.
العاش رەت تحەكۆوندو بويىنشا جۇلدەلەر 2000-جىلى سيدنەيدەگى جازعى وليمپيادا ويىندارىندا ساراپقا سالىندى.
ەستە قالار وقيعالار
2009-جىلى ب ۇ ۇ- نىڭ قازاقستانداعى دامۋ باعدارلاماسى جانە «سامۇرىق-ەنەرگو» ا ق ەلىمىزدە جەل جانە كۇن ەلەكتر ستانتسيالارىن سالۋ جوبالارىن ىسكە اسىرۋ ءۇشىن جاڭارتىلاتىن ەنەرگيا كوزدەرىن پايدالانۋ سالاسىنداعى ىنتىماقتاستىق تۋرالى مەموراندۋمعا قول قويدى.
2009-جىلى استانادا العاش رەت اكىمدىك الدىنداعى الاڭدا «حالىقتار دوستىعى-2009» V حالىقارالىق اۆتوشەرۋى باستالدى.
شارا «Mercur Auto»، «Volkswagen AG» كومپانيالارىنىڭ قولداۋىمەن ۇيىمداستىرىلدى. استانا - بۋراباي - كوكشەتاۋ - قوستاناي - اقتوبە - ورال باعىتى بويىنشا وتكەن مارشرۋتتىڭ جالپى ۇزىندىعى 2086 شاقىرىمدى قۇرادى.
2010 -جىلى ت م د جانە بالتىق ەلدەرىنىڭ 14-ۇلتتىق كينەماتوگرافيا فورۋمىندا قازاقستاندىق رەجيسسەر راشيد نۇعمانوۆتىڭ «يگلا. رەميكس» تۋىندىسىنىڭ تۇساۋكەسەرى بولدى. «يگلا» فيلىمىنە رەجيسسەردىڭ ەرتەدە تۇسىرىلگەن ماتەريالدارى، سونداي-اق كوميكستەر، گرافيكالىق ەلەمەنتتەر قوسىلدى.
2013 -جىلى قازاقستان سانكت-پەتەربۋرگتاعى «توپ-20» سامميتىنە ەۋرازەق، كەدەندىك وداق جانە ت م د وكىلى رەتىندە شاقىرىلدى.
2016 -جىلى قازاقستان پرەزيدەنتى نۇرسۇلتان نازاربايەۆ قىتايداعى G20 سامميتىنە قاتىسىپ، ءسوز سويلەدى. جينالعاندارعا ارناعان سوزىندە نۇرسۇلتان نازاربايەۆ G20 سامميتىنىڭ ۇمىتكە تولى كۇردەلى كەزەڭدە ءوتىپ وتىرعانىن اتاپ ءوتتى. نۇرسۇلتان نازاربايەۆ G20 سامميتى اياسىندا ەكىجاقتى كەزدەسۋلەر دە وتكىزدى.
اتاپ ايتقاندا، نۇرسۇلتان نازاربايەۆ رەسەي فەدەراتسياسىنىڭ پرەزيدەنتى ۆ. پۋتينمەن، فرانسيا پرەزيدەنتى ف. وللاندپەن، گەرمانيانىڭ فەدەرالدى كانتسلەرى ا. مەركەلمەن، امەريكا قۇراما شتاتتارىنىڭ پرەزيدەنتى باراك وبامامەن جانە ت. ب. كەزدەستى.
2016 -جىلى ەلوردادا استانا مارافون حالىقارالىق دەڭگەيدەگى اۋقىمدى سپورت شاراسى - قايىرىمدىلىق مارافونى باستالدى. ءىس- شاراعا 4500 ادام قاتىستى. سونىڭ ىشىندە الەمنىڭ 25 ەلىنەن (ا ق ش، فرانسيا، يتاليا، جاپونيا، اۋستراليا، گەرمانيا، يران، يرلانديا، بەلگيا، رەسەي، برازيليا، ەستونيا، قىتاي، وڭتۇستىك كورەيا، تۇركيا، گرەكيا، كانادا، ب ا ءا، نيدەرلاند جانە باسقا دا ەلدەر) كەلگەن سپورتشىلار بولدى.
2019 -جىلى نۇر-سۇلتاندا ازيا قۇرلىعىندا ورنالاسقان ەلدەر اراسىنداعى ادەبي جانە مادەني بايلانىستاردى نىعايتۋعا جانە ودان ءارى دامىتۋعا باعىتتالعان ازيا ەلدەرى جازۋشىلارىنىڭ العاشقى فورۋمى ءوتتى. ءىرى حالىقارالىق ءىس-شاراعا العاش رەت قىتاي، ءۇندىستان، رەسەي، يران، جاپونيا، تۇركيا، ساۋد ارابياسى، بىرىككەن اراب امىرلىكتەرى، يزرايل، وڭتۇستىك كورەيا، وڭتۇستىك-شىعىس جانە ورتالىق ازيا ەلدەرى سياقتى ازيانىڭ 44 ەلىنىڭ وكىلدەرى قاتىستى.
فورۋم قورىتىندىسى بويىنشا فورۋم دەلەگاتتارىنىڭ ازيا ادەبيەتىن دامىتۋ ماسەلەلەرى بويىنشا مەملەكەتتەر باسشىلارى مەن ازيا ۇكىمەتتەرىنە ادەبي جوبالاردى قولداۋ تۋرالى ۇسىنىستارىمەن ۇندەۋى قابىلداندى.
