قازاقستاندىقتارعا 4 پايىزبەن نەسيە بەرىلەدى
بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتىپ بەردى، دەپ حابارلايدى قازاقپارات ءتىلشىسى.
اتالعان باستاما «ەڭبەك» مەملەكەتتىك باعدارلاماسىندا كورسەتىلگەن. «بۇل باعدارلاماعا 2020 -جىلى 123 ميلليارد تەڭگە قاراستىرىلعان، 535 مىڭ ادامدى قامتيمىز دەپ جوسپارلاپ وتىرمىز. ونىڭ ىشىندە از قامتىلعان نەمەسە كوپبالالى جانۇياداعى جۇمىسسىز ازاماتتارعا جەڭىلدىكتەر قاراستىرىپ ۇلگەردىك. ەگەر دە «ەڭبەك» باعدارلاماسى بويىنشا، شاعىن نەسيەلەر 6 پايىزبەن بەس جىلعا دەيىن بەرىلەتىن بولسا، از قامتىلعان نەمەسە كوپبالالى جانۇياداعى جۇمىسسىز ازاماتتارعا بۇل نەسيە 4 پايىزبەن جەتى جىلعا دەيىن بەرىلەتىن بولادى» ، - دەدى ب. نۇرىمبەتوۆ ورتالىق كوممۋنيكاتسيالار قىزمەتىندە وتكەن بريفينگتە.
سونىمەن بىرگە، از قامتىلعان نەمەسە كوپبالالى جانۇيا مۇشەلەرى ءۇشىن كىشىگىرىم جەكە بيزنەس اشۋعا تەگىن قايتارىمسىز گرانتتار بەرۋ ءتارتىبى دە وزگەرتىلدى. مۇندا ءبىر ايلىق كاسىپكەرلىك نەگىزدەرى تۋرالى مىندەتتى وقۋ تالابى الىنىپ تاستالدى. ياعني، ولار وقۋدان وتپەي- اق، گرانت الا الادى.
«بۇگىندە جۇمىستان قىسقارۋى مۇمكىن تاۋەكەلدەردى ەسكەرە وتىرىپ، ۇكىمەت جاڭا جۇمىسپەن قامتۋ كارتاسىن ازىرلەپ جاتىر. بۇل كارتا ارقىلى ەلىمىزدەگى ينفراقۇرىلىمدىق جوبالاردى جۇزەگە اسىرۋدى كوزدەپ وتىرمىز. ياعني، الەۋمەتتىك نىسانداردى جاڭعىرتۋ، كۇردەلى جوندەۋ، ورتا جوندەۋ، تۇرعىن- ءۇي كوممۋنالدىق ينفراقۇرىلىمداردى جاڭارتۋ، ينجەنەرلىك- كولىكتىك ينفراقۇرىلىمداردى جاڭارتۋ، ەلدىمەكەندەردى اباتتاندىرۋ جۇمىستارى كوزدەلەدى. ونىڭ شارتتارى مەن نەگىزگى تەتىكتەرىن ەرتەڭگى ۇكىمەت وتىرىسىندا تولىق جاريالايمىز» ، - دەدى مينيستر. بۇعان دەيىن مينيستر قىسقارتۋعا ۇشىراعان جۇمىسشىلاردىڭ 6 اي بويى الەۋمەتتىك تولەم الا الاتىنىن تۇسىندىرگەن ەدى.
