ساراپشى جولداۋدا ايتىلعان 4 نەگىزگى ماسەلەنى اتاپ بەردى
ورتالىق كوممۋنيكاتسيالار قىزمەتىندە ەۋرازيا ينتەگراتسيالىق ينستيتۋتىنىڭ ساراپشىلارى ق ر پرەزيدەنتى قاسىم-جومارت توقايەۆتىڭ قازاقستان حالقىنا جولداۋىن تالقىلادى. ماسكەۋلىك تاريحشى الەكسەي پيلكو جولداۋدا ايتىلعان 4 نەگىزگى ماسەلەنى ەرەكشە ءبولىپ تالدادى.
«قوعام مەن بيلىك ديالوگى مەملەكەت تۇراقتىلىعى ءۇشىن وتە ماڭىزدى شارت بولىپ سانالادى. كەز كەلگەن قولايسىز ماسەلە بويىنشا اشىق تالقىلاۋ بولماسا ونىڭ شەشىمى تابىلمايدى. وسى تۇرعىدان العاندا، ۇلتتىق قوعامدىق سەنىم كەڭەسىنىڭ جۇمىسىنا قاجەتتىلىك بار. كوپپارتيالى جۇيەگە كوشۋ تۋرالى كوپ ايتىلىپ جاتىر. بۇل بىرىنشىدەن، باسەكەلى ورتانى قالىپتاستىرادى. كوپپارتيالىلىق بيلىك تارماعىن نەگاتيۆتى سۇرىپتاۋدان ساقتايدى. قوعامنىڭ ءتۇرلى توپتارى مەملەكەت ىسىنە ارالاسا السا، ءوزارا تۇسىنىسە السا، ودان ەشبىر ەل ۇتىلمايدى. ەگەر قازاقستان كوپپارتيالى تەڭگەرىمدى جۇيەنى قالىپتاستىرا السا، بۇل مەملەكەت بولاشاعى ءۇشىن وتە جاقسى ىرگەتاس بولادى»، - دەدى الەكسەي پيلكو.
«سوت جۇيەسىن رەفورمالاۋدىڭ ار جاعىندا پوليتسيا مەن سىبايلاس جەمقورلىققا قارسى ءىس قيمىلدى رەفورمالاۋ جاتىر. مەنىڭ ويىمشا، پوستكەڭەستىك كەڭىستىك ءۇشىنشى كەزەڭنەن ءوتىپ جاتىر. ءبىرىنشىسى تاۋەلسىزدىك الۋعا ۇمتىلىس كەزەڭى بولسا، ەكىنشى كەزەڭدە الەۋمەتتىك قامسىزدىق ءبىرىنشى ورىندا بولدى. قوعامنىڭ ءوز قۇقىعىن تالاپ ەتىپ، مەملەكەتتىڭ وعان قۇلاق تۇرۋىنە دەگەن سۇرانىسى ارتىپ وتىر. بيلىك وسى سۇرانىستارعا جاۋاپ رەتىندە اقىلعا قونىمدى سوت جۇيەسىن، ساۋاتتى جۇمىس ىستەيتىن پوليتسيا مەن سىبايلاس جەمقورلىققا قارسى قاتاڭ كۇرەس جۇيەسىن ۇسىنۋى كەرەك. ەكونوميكا تۋرالى ايتساق، شاعىن بيزنەستى دامىتۋعا اكتسەنت بەرىلدى. زەينەتاقى جۇيەسىن رەفورمالاۋ مۇمكىندىگى ءسوز بولدى. بۇل وتە سەزىمتال سالا. ونىڭ وسى جولداۋدا كورىنىس تابۋى ورىندى. ەگەر وسى ماسەلەنى شەشە السا، مەملەكەتتىك تۇراقتىلىعى ارتا تۇسەدى. پوستكەڭەستىك كەڭىستىكتە قازاقستان ساياسي ءترانزيتتى ءبىرىنشى بولىپ باستادى. بۇل جولعا رەسەي دە، بەلارۋس ەلى دە، باسقا دا ەلدەر ءوتۋى كەرەك. ەگەر بۇل كەزەڭنەن قازاقستان ءساتتى وتسە، وزگە ەلدەرگە دە جەڭىل بولادى»، - دەدى الەكسەي پيلكو.
اۆتور: ەسىمجان ناقتىباي
