بەردىبەك ساپاربايەۆ 4 بالاسى بار وتباسىنىڭ شىلدەدەن باستاپ قانشا الاتىنىن ەسەپتەپ بەردى

مينيستر ءتورت بالاسى بار انالاردىڭ 114 مىڭ 449 تەڭگەگە دەيىن كومەك الۋى مۇمكىن ەكەنىن ايتتى دەپ حابارلايدى Sputnik قازاقستان.

بەردىبەك ساپاربايەۆ 1- شىلدەدەن باستاپ اتاۋلى الەۋمەتتىك كومەكتى ەسەپتەۋ كەزىندە ەڭ تومەنگى كۇنكورىس دەڭگەيى كوبەيتىنىن اتاپ ءوتتى.

«وسى ۋاقىتقا دەيىن ونىڭ كولەمى %50 پايىزعا دەيىن، ياعني 14849 تەڭگە بولىپ ەسەپتەلسە، ەندى 20789 تەڭگەگە دەيىن كوبەيەدى. ناتيجەسىندە اتاۋلى الەۋمەتتىك كومەكتى الۋشىلار سانى قازىرگى 570 مىڭ ادامنان 830 مىڭ ادامعا دەيىن ارتادى»، - دەدى مينيستر ۇكىمەتتە وتكەن باسپا ءسوز ءماسليحاتىندا.

وسى ورايدا مينيستر ءتورت بالاسى بار انانىڭ قانشا الاتىنىن ەسەپتەپ بەرگەن.

«قازىر ول كىسى 63740 تەڭگە السا، جوعارىلاۋ ناتيجەسىندە 103945 تەڭگە الادى. ەگەر ول ادامنىڭ تابىسى كۇنكورىس دەڭگەيىنەن تومەن بولسا، تاعى دا قوسىمشا جاردەماقى تولەنەدى. سوندا بۇل كىسىلەردىڭ تابىسى 114449 تەڭگە بولادى»، - دەدى مينيستر.

سونىمەن قاتار، ۆەدومستۆو باسشىسى وتباسىنىڭ كىرىسىن ەسەپتەگەن كەزدە «التىن القا»، «كۇمىس القا» يەگەرلەرىنە بەرىلەتىن جاردەماقى، مۇگەدەك بالالارعا الاتىن جاردەماقى، شاكىرتاقى ەسەپكە الىنبايتىنىن جەتكىزدى. ءبىراق اتا-ەنەسىمەن بىرگە تۇراتىن وتباسىنىڭ كىرىسىن ەسەپتەگەن كەزدە، ولاردىڭ زەينەتاقىسى ەسكەرىلەدى.

«اتاۋلى الەۋمەتتىك كومەكتى تولەگەن كەزدە، قازىرگى تاڭدا ءبىر بالاعا 4834 تەڭگە بولسا، ەندى اي سايىن ءاربىر بالاعا 20789 تەڭگە تولەنەدى. بالالار وقيتىن بولسا وقۋ بىتىرگەنگە دەيىن، ياعني 23 جاسقا دەيىن جاردەماقى بەرىلەدى»، - دەدى ساپاربايەۆ ءوز سوزىندە.

سونداي-اق، مينيستر مەملەكەتتەن كومەك الۋ ءۇشىن قۇجات راسىمدەۋ كەزىندە ارى-بەرى جۇگىرە بەرمەس ءۇشىن، «ەلەكتروندى حالىق» اقپاراتتىق جۇيەسى جۇمىس ىستەيتىنىن اتاپ ءوتتى.

ەستەرىڭىزگە سالا كەتەيىك، ءبىرىنشى شىلدەدەن باستاپ ەلىمىزدەگى كوپبالالى وتباسىلار جەكە كۋالىكتەرىن كورسەتىپ الەۋمەتتىك كومەك الاتىن بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى