قىتاي بيلىگى 4 قازاقستاندىقتى جازاسىن ءوز ەلىندە وتەۋ ءۇشىن قايتاردى
ولار ق ح ر شىڭجاڭ-ۇيعىر اۆتونوميالىق ولكەسى (ش ۇ ا و) ايماعىندا اسا اۋىر قىلمىس جاساعانى ءۇشىن ءولىم جازاسىنا نەمەسە ءومىر بويىنا باس بوستاندىعىنان ايىرۋ جازاسىنا تاعايىندالعان بولاتىن.
جەرگىلىكتى ۋاقىت بويىنشا ساعات 2 دە (00.00 استانا ۋاقىتى بويىنشا) ولار جازاسىن ەلدە وتەۋ ءۇشىن ءۇرىمجى قالاسىنان الماتىعا قاراي ۇشىپ كەتتى.
سوتتالعان قازاقستاندىقتاردى بەرۋ «قازاقستان رەسپۋبليكاسى مەن قىتاي حالىق رەسپۋبليكاسى اراسىنداعى سوتتالعان ادامداردى بەرۋ تۋرالى كەلىسىم» اياسىندا ق ح ر- داعى ق ر- دىڭ ەلشىلىگىنىڭ كومەگىمەن جۇزەگە اسىرىلدى. كەلىسىم 2015-جىلدىڭ 30- قىركۇيەك كۇنى ەلباسى نۇرسۇلتان نازاربايەۆتىڭ قىتايعا رەسمي ساپارى بارىسىندا كۇشىنە ەنگەن بولاتىن.
«قازاقستان ازاماتتارىنىڭ شەت مەملەكەتتەردە قۇقىقتارىن قورعاۋ قازاقستاننىڭ ق ح ر- داعى ەلشىلىگىنىڭ كونسۋلدىق قىزمەتىندەگى باستى باعىتتارىنىڭ ءبىرى بولىپ تابىلادى. جىل باسىنان بەرى ءبىز سوتتالۋشىلارمەن ولاردىڭ جاعدايلارى مەن قانداي دا ءبىر وتىنىشتەرىن ءبىلۋ ءۇشىن شىڭجاڭ-ۇيعىر اۆتونوميالىق ولكەسىندە (ءۇرىمجى، التاي، قۇلجا قالالارىندا) ەكى رەت كەزدەستىك»، - دەدى قازاقپارات تىلشىسىنە ق ح ر- داعى ق ر ەلشىلىگىنىڭ كونسۋلدىق ءبولىمىنىڭ باسشىسى بولات سىرلىبايەۆ.
ديپلوماتتىڭ ايتۋىنشا، 2015-جىلى ق ح ر- داعى ق ر ەلشىلىگىنىڭ كونسۋلدىق ءبولىمىنىڭ قىزمەتكەرلەرى گۋڭجوۋ، شەنجىن، تيانجيڭ، شيان، ءۇرىمجى، التاي، قۇلجا قالالارىنا بارىپ، قىتايدا جازاسىن وتەپ جۇرگەن ق ر ازاماتتارىمەن (15) كەزدەسۋ وتكىزگەن. ب. سىرلىبايەۆ سونداي-اق وتكەن جىلى ق ر ەلشىلىگىنىڭ كونسۋلدىق بولىمىنە قازاقستاننىڭ زاڭدى جانە جەكە تۇلعالارىنىڭ قۇقىقتارىن قورعاۋ بويىنشا 89 ءوتىنىش كەلىپ تۇسكەنىن ايتىپ ءوتتى. ولاردىڭ ءارقايسىنا زاڭدى كومەك كورسەتىلدى.
ەسكە سالا كەتەيىك، 2015-جىلدىڭ 28- تامىز كۇنى ق ر مەن ق ح ر اراسىنداعى سوتتالعان ادامداردى بەرۋ تۋرالى كەلىسىم كۇشىنە ەنبەي تۇرىپ، قىتايلىق تاراپ قازاقستانعا قىتايدا ۇزاق جىل بويى جازاسىن وتەپ جۇرگەن بەس سوتتالۋشىنى قايتارعان بولاتىن. بۇل ق ر س ءى م، ق ر باس پروكۋراتۋراسى جانە ق ح ر- داعى ق ر ەلشىلىگىنىڭ قىتايلىق ارىپتەستەرىمەن ۇزاق جىلدار بويى بىرلەسىپ جاساعان جۇمىستارىنىڭ ناتيجەسىندە مۇمكىن بولدى.
