مەملەكەتتىك ورگاندار باسشىلارىنىڭ بلوگ-تۇعىرناماسىنا اي سايىن 4 مىڭداي ارىز تۇسەدى

بۇل تۋرالى بۇگىن ق ر ينۆەستيتسيالار جانە دامۋ مينيسترلىگىنىڭ بايلانىس، اقپاراتتاندىرۋ جانە اقپارات كوميتەتى مەن ب ۇ ۇ سالالىق كوميتەتى بىرلەسىپ وتكىزگەن «اشىق مالىمەتتەر» سەمينارى بارىسىندا اتالعان كوميتەت ءتوراعاسى ساكەن سارسەنوۆ ايتتى.

«اشىق ۇكىمەت» قالىپتاستىرۋ 2010 -جىلى ەلەكتروندى ۇكىمەت پورتالىندا بلوگ-تۇعىرنامالار مەن ينتەرنەت- كونفەرەنتسيالار اشۋمەن باستالعان بولاتىن.

ساندارعا كەلەر بولساق، سوڭعى 5 جىلدا مەمورگاندار باسشىلارىنىڭ بلوگ-تۇعىرنامالارىنا 290 مىڭداي ارىز- شاعىم تۇسكەن، بۇل اي سايىن 4 مىڭداي ارىز تۇسەدى دەگەن ءسوز»، - دەدى س. سارسەنوۆ.

ونىڭ ايتۋىنشا، قازىرگى ۋاقىتتا قازاقستاندا «اشىق مالىمەتتەردىڭ» ءبىرىڭعاي پورتالى جۇمىس ىستەيدى. وندا دەنساۋلىق ساقتاۋ، ءبىلىم، كولىك جانە كوممۋنيكاتسيا، الەۋمەتتىك قامسىزداندىرۋ جانە باسقا دا سالالار بويىنشا 180 ءتۇرلى مالىمەت الۋعا بولادى. سونىمەن قاتار، ازىرلەنىپ جاتقان زاڭ جوبالارىن، مەملەكەتتىك قىزمەت ستاندارتتارىن جانە باسقا دا نورماتيۆتىك- قۇقىقتىق اكتىلەردى تالقىلاۋعا ارنالعان ءبىرىڭعاي «الاڭ» دا بار.

«سونداي-اق، «اشىق ۇكىمەتتى» ودان ءارى دامىتۋ ماقاتىنا ارنالعان اقپاراتتاندىرۋ تۋرالى جاڭا زاڭ جوباسى قازىر ق ر پارلامەنتىندە تالقىلاۋدا جاتىر. وندا «اشىق ۇكىمەت» پەن «اشىق مالىمەت» بويىنشا بارلىق نورمالار ناقتى جازىلعان. سونىمەن قاتار، «اشىق بيۋدجەت» پەن «اشىق پەتيتسيالار» تۋرالى جاڭا مودۋلدەر جاساۋ دا جوسپارلانىپ وتىر»، - دەپ ءتۇسىندىردى ول.

ايتا كەتەيىك، سەمينار جۇمىسىنا مەملەكەتتىك ورگاندار قىزمەتكەرلەرى، حالىقارالىق ۇيىمدار وكىلدەرى، سونداي-اق «اشىق مالىمەتتەرمەن» قامتاماسىز ەتۋ سالاسىنىڭ ساراپشىلارى قاتىسۋدا.

اۆتور: ءابۋ-اسقار مەكەش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى