باتىس قازاقستاندا 49 ەلدى مەكەن تاراپ كەتۋى مۇمكىن

ب ق و ستراتەگيا جانە ەكونوميكالىق دامۋ باسقارماسىنان ءمالىم ەتكەنىندەي، بۇل ەلدى مەكەندەر (بارلىعى 1166 ادام) تۇرعىندار سانى جونىنەن اۋىل مارتەبەسىنە سايكەس كەلمەيدى، ياعني 50 ادامنان كەم.

ءبورلى اۋدانىندا وسىنداي 4، جانىبەكتە 3، بايتەرەكتە 8، كازتالوۆتا 1، قاراتوبەدە 3، سىرىمدا 8، تاسقالادا 7، تەرەكتىدە 5، شىڭعىرلاۋدا 8، ورال قالاسى اۋماعىندا 2 ەلدى مەكەن بار.

اتالعان ەلدى مەكەندەردە مەكتەپتەر جابىلعان. دەنساۋلىق ساقتاۋ نىساندارى 8 ىندە، ورتالىق سۋمەن قامتۋ جۇيەسى بىرەۋىندە، گاز 9 ىندا عانا بار. شىڭعىرلاۋ اۋدانىنداعى سۇلۋكولدە تۇرعىن قالماعان، ودان باسقا ەلدى مەكەندەردىڭ بارىندە ەلەكتر جارىعى بار.

«قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» 1993-جىلعى 8- جەلتوقسانداعى 2572-XII№ زاڭىنا سايكەس تۇرعىندار سانى 50 ادامعا جەتپەيتىن ەلدى مەكەندەر جاقىن ماڭداعى اۋىل قۇرامىنا قوسىلادى.

سوڭعى ءۇش جىلدا وبلىستا 17 ەلدى مەكەن (2020-جىلى – 8، 2021-جىلى - 9) تاراتىلدى.

«ءۇش جىل ىشىندە اۋداندارداعى جەرگىلىكتى اتقارۋشى ورگاندار ءتيىستى تالاپقا ساي كەلمەيتىن ەلدى مەكەندەردى تاراتۋ نەمەسە سولاردا تۇراتىن تۇرعىندار سانىن كوبەيتۋ ارقىلى جاعدايدى جاقسارتۋ باعىتىندا شەشىم قابىلداۋى ءتيىس»، دەپ حابارلادى ۆەدومستۆودان.

ب ق و- نىڭ اكىمشىلىك-اۋماقتىق ءبولىنىسى وبلىستىق ماڭىزى بار 1، اۋداندىق ماڭىزى بار 1 قالادان، 12 اۋدان، 150 اۋىلدىق جانە كەنتتىك وكرۋگتەردەن، 314,9 مىڭ ادام مەكەندەيتىن 416 اۋىلدان تۇرادى.

«اۋىل - ەل بەسىگى» جوباسى اياسىندا پەرسپەكتيۆتىك اۋىلدار قاتارىنا 78 تىرەكتى، ستراتەگيالىق ماڭىزى بار شەكارا ماڭىنداعى 35 جانە جەر سەرىكتىك بايلانىسى بار 110 ەلدى مەكەن كىرەدى. بۇلاردا 260 مىڭنان استام تۇرعىن (82,5 پايىز) بار.

ەسكە سالا كەتەيىك، بۇدان بۇرىن باتىس قازاقستان وبلىسىندا پەرسپەكتيۆتى اۋىلدار ىرىكتەلگەنىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى