قوستاناي وبلىسىندا 48 بالاسى بار وتباسى تۇرادى
ونىڭ ۇشەۋى - تۋعان، 45 ى - اسىراپ العان بالالارى. بۇگىندە سولاردىڭ الدى ستۋدەنت اتانىپ، وقىپ جاتسا، كەنجەسى نەبارى 3 جاستا. وسىنشاما جەتىمدى باۋىرىنا باسقان رۋستام مەن گۋليا شۋكۋروۆتاردىڭ بار ارمانى - بالالارىنا دۇرىس تاربيە بەرىپ، ءوسىرىپ، جەتكىزۋ.
«بالا تاربيەسىندە ەرتەدەن قالىپتاسقان ءداستۇرىمىز بار عوي. سونى عانا ۇستانامىز. اتا-انانى سىيلاۋ، ۇلكەنگە قۇرمەت، كىشىگە ىزەت ءبىلدىرۋ. قامىققانعا قامقور، جابىققانعا جاناشىر بولۋ. ءبىرىنشى كەزەكتە وسى قۇندىلىقتاردى سانالارىنا سىڭىرۋگە تىرىسامىز»، - دەيدى كوپبالالى اكە رۋستام شۋكۋروۆ.
رۋستام مەن گۋليانىڭ وزدەرى دە كوپبالالى وتباسىلارىنان شىققان. سوندىقتان ولار جاۋاپكەرشىلىك جۇگىن جاقسى سەزىنەدى. العاش 1998 -جىلى ليساكوۆتاعى جەتىمدەر ۇيىنەن گۋليا بىردەن 7 بالانى الىپ شىققاندا رۋستام قارسىلىق بىلدىرمەگەن. ودان كەيىن جىل سايىن قوسىلىپ، بالا سانى 48-گە جەتىپتى. ولاردىڭ ۇشەۋى - ءوز بالالارى ەسەيىپ، ەرجەتكەن. بۇل وتباسى مەملەكەتتىڭ كومەك-قولداۋىنا دا كوپ يەك ارتىپ وتىرعان جوق. رۋستام - جەكە كاسىپكەر. ساۋدا ورتالىعى بار. بۇرىن ساتىپ العان 5 قاباتتى ءۇيدىڭ تولىق 2 قاباتىندا بالا شاعاسىمەن تۇرادى.
«جەكە كوتتەدج ۋچاسكەمىز دە بار. سيىر، قوي، ەشكى، تاۋىق، ۇيرەك ۇستايمىز. تۋعان 2 بالام سونىڭ باسىندا. باسقالارى دا سول جاققا بارعاندى قىزىق كورەدى»، - دەيدى كوپبالالى اكە.
ال گۋليا ءۇي شارۋاسىندا. باۋ-باقشا باپتاپ، اس ءمازىرىن دايىنداپ، بالالارعا قاراۋ - كۇندەلىكتى تىرلىگى. ارينە، ەرەسەك قىزدارى كومەكتەسەدى. بىرەۋى سىرقاتتانىپ قالسا، الاڭداپ، ۇيىقتامايتىن كەزدەرىم بولادى دەيدى.
«بۇرىن ازداۋ بولعاندا ءار تۋعان كۇندى جەكە اتاپ وتەتىنبىز. قازىر اي سايىن 7-8 تۋعان كۇننەن كەلەدى. سوندىقتان ءار ايدىڭ ءبىر كۇنىن تاڭداپ الىپ، قوسىپ تويلايمىز. ءبىر-بىرىمىزگە سىيلىقتار جاساپ، ءتاتتى توقاش، بالىشتەر پىسىرەمىز»، - دەيدى كوپبالالى انا گۋليا مانسۇروۆا.
قازىر 48 بالانىڭ سەگىزى - ستۋدەنت. بىرەۋى اقىلى وقۋدا. الداعى 2 جىلدا تاعى 12 بالا مەكتەپ بىتىرمەك. ولاردىڭ وقۋى قالاي بولماق دەگەن سۇراعىمىزعا، رۋسلان «ءار بالانىڭ ءوز نەسىبەسى بار، بىردەڭە قىلامىز» دەپ قىسقا قايىردى.
