رەسپۋبليكا قاھارماندارى: 48 ادامدى اجالدان قۇتقارعان ەرجان ءامىرحانوۆ سىن ساعاتتى ەسكە الدى
سول كەزدە ءتىلسىز جاۋدى كورگەن ەرجان ءامىرحانوۆ دابىل قاعىپ، ادامداردى وياتا باستايدى. جاۋىرىنى قاقپاقتاي، جۇدىرىعى توقپاقتاي، الىپ دەنەلى ازامات اۆتوبۋستىڭ ەسىگىن تەۋىپ اشىپ، جولاۋشىلاردى دالاعا شىعارادى. وسىلايشا، ەڭبەكتەگەن بالا مەن ەڭكەيگەن قارياعا دەيىن، بارلىعى 48 ادام اجالدان امان قالدى. بۇل وقيعا 2018 -جىلدىڭ تامىز ايىندا بولدى. ال ءدال وسى جىلدىڭ قاڭتارىندا اقتوبە وبلىسىندا اۆتوبۋس ورتەنىپ، 52 ادام كوز جۇمعان ەدى. مىنە، سوندىقتان قارالى وقيعانىڭ قايتالانۋىنا جول بەرمەگەن ەرجان ءامىرحانوۆتى قازاقپاراتتىڭ «رەسپۋبليكا قاھارماندارى» اتتى جاڭا جوباسىنا لايىق دەپ تاپتىق.
«جۇدىرىق جۇمساۋعا تۋرا كەلدى»
وسىدان ءتورت جىل بۇرىن تامىز ايىنىڭ 4 ى كۇنى ساعات 19.50-دە ەرجان ءامىرحانوۆ كولىك ساتىپ الۋ ماقساتىندا «سەمەي – نوۆوسىبىر» باعىتىندا اۆتوبۋسپەن جولعا شىعادى. تۇنگى ساعات 3.20-دا قوعامدىق كولىك الەيسك قالاسىنا تاياعان. بارلىق جولاۋشى تۇگەل دەرلىك ۇيقىدا جاتتى. كەنەت اۆتوبۋستان ءورت شىعىپ، لەزدە جان-جاققا لاۋلاي باستايدى. مۇنى بايقاپ قالعان جالعىز ادام بولدى. ول - سەمەيلىك ەرجان.
«الاڭسىز ۇيىقتاپ جاتقانىمدا ورىندىعىمنىڭ استى جىپ-جىلى بولىپ كەتتى. كوزىمدى اشسام استىمدا وت جانىپ جاتىر. بىردەن جۇرگىزۋشىگە جۇگىرىپ بارىپ اۆتوبۋستا ءورت شىققانىن حابارلاپ، كولىكتى توقتاتۋىن سۇرادىم. ءبىراق ول مەنىڭ سوزىمە سەنبەي قويدى. ال ەكىنشى جۇرگىزۋشى بولسا - تەرەڭ ۇيقىدا. كوپ كىدىرمەۋگە بولمايتىندىقتان جۇرگىزۋشىگە جۇدىرىق جۇمساۋعا تۋرا كەلدى. وسىدان كەيىن عانا ول اۆتوبۋستى توقتاتتى. ال قايتادان ورنىما كەلسەم، قىزىل جالىن ءبىرشاما جەردى شارپىپ ۇلگەرگەن. «جانىپ جاتىرمىز» دەپ ايقايلاسام دا ادامدار سەزبەيدى. سويتسەم اۆتوبۋستىڭ ارتقى بولىگىندە وتىرعانداردىڭ كوبى كوك تۇتىنگە ۋلانىپ ۇلگەرگەن ەكەن. ال كەيبىرى نە بولعانىن تۇسىنبەي، قاراپ وتىر. ءتىپتى جۇرگىزۋشى اۆتوبۋستىڭ ەسىگىن دە اشپادى. سودان كەيىن ەكى ەسىكتى تەپكىلەپ، يتەرىپ جارتىلاي اشتىم. الدىمەن بالالاردى دالاعا شىعاردىم. كوتەرىپ الىپ، بىرىنەن كەيىن ءبىرىن لاقتىرا بەردىم. ويتكەنى ءورت كۇشەيىپ بارادى. ال جۇرگىزۋشى ءورت ءسوندىرۋ قۇرالىمەن ءتىلسىز جاۋدى ءسوندىرىپ جاتتى. ءبىراق قىزىل جالىن دەس بەرەر ەمەس»، - دەپ ەسكە الدى ول.
جولاۋشىلاردىڭ اراسىندا 3 ايلىق سابيدەن ەگدە تارتقان زەينەتكەرگە دەيىن بار. بارلىعى - 48 ادام. ونىڭ 12 سى - بالا. ەرجاننىڭ ايتۋىنشا، اۆتوبۋس نەبارى 4 مينۋتتىڭ ىشىندە ورتكە ورانعان. ال ول جولاۋشىلاردى 1 مينۋت 45 سەكۋندتا قۇتقارىپ ۇلگەرگەن. قاراپ تۇرساڭىز قاس-قاعىم ءسات. ءبىراق وسى ءبىر عانا-اق ءساتتىڭ ىشىندە قانشا ادامنىڭ تاعدىرى جاتىر…
«رەسەيگە بارعاندا كولىك ساتىپ الامىن دەپ 1400000 تەڭگە الىپ شىققان ەدىم. ءبىراق ادامداردى سىرتقا شىعارامىن دەپ جانتالاسىپ جۇرگەنىمدە قۇجاتتارىم مەن اقشام جانىپ كەتتى. وقيعا ورنىنا شامامەن 10 مينۋت ىشىندە ءورت سوندىرۋشىلەر جەتىپ، قىزىل جالىندى اۋىزدىقتادى. بارلىق جولاۋشى باسقا اۆتوبۋسقا وتىرعىزىلىپ، بارناۋل قالاسىنا جەتكىزىلدى»، - دەيدى ەرجان ءامىرحانوۆ.
اۆتوبۋس سەمەيدەگى «سۇلۋ» اۆتوبەكەتىنەن شىققان ەكەن. كەيىن ەرجان اۆتوبەكەتتىڭ باسشىلىعىنا حابارلاسىپ، ادامداردىڭ ومىرىنە نەمقۇرايلى قاراۋعا بولمايتىنىن ايتقان. ءبىراق اۆتوبەكەتتەگىلەر اۆتوبۋستىڭ رەسەي ەلىنە تيەسىلى ەكەنىن، بارلىق ارىز-شاعىمدى سولارعا ايتۋ كەرەك ەكەنىن جەتكىزىپتى.
وسىدان كەيىن ەرجان ءامىرحانوۆتىڭ ەرلىگى جايلى وتاندىق جانە رەسەيلىك ب ا ق وكىلدەرى جارىسا جازدى. ءتىپتى كورشى ەلدەگى تانىمال تەلەجۋرناليست اندرەي مالاحوۆ ونى ءوز باعدارلاماسىنا شاقىرعان. ءبىراق قاراپايىم مىنەزدى ازامات بۇل ۇسىنىستان باس تارتتى.
بۇگىندە ول جۇبايىمەن بىرگە 4 بالا تاربيەلەپ وتىر. ۇلكەنى - 18، كىشكەنتايى - 8 جاستا. گرەك-ريم كۇرەسىنەن جاتتىقتىرۋشى رەتىندە شاكىرت تاربيەلەپ، جارىستارعا اپارىپ ءجۇر.
باتىرعا باسپانا بەرىلدى
2018 -جىلدىڭ تامىز ايىنىڭ ورتاسىنا تاياۋ سەمەي قالاسىنىڭ اكىمى ەرماك ءسالىموۆ ەرجان امىرحانوۆپەن كەزدەسكەن. بەيبىت كۇننىڭ باتىرىنا ريزاشىلىعىن بىلدىرگەن اكىم، ءوز باسىن قاتەرگە تىگىپ، ەرلىك جاساعانىنا تاڭداي قاقتى. كەزدەسۋ بارىسىندا جەرگىلىكتى كاسىپكەر، «گوردورستروي» ج ش س ديرەكتورى باۋىرجان قايرامبايەۆ ەرجانعا 1 ميلليون تەڭگە تابىستادى.
2019 -جىلدىڭ جازىندا ونىڭ تەلەفونىنا حابارلاسىپ، الماتىعا ۇشىپ كەلۋىن وتىنگەن Lancaster Group Kaxakhstan كومپانياسىنىڭ اكسيونەرلەرى بەرىك قانيەۆ پەن يۋري پاك كۇتپەگەن توسىنسىي جاسادى.
«4-شىلدە كۇنى الماتىعا جەتتىم. مەنى ارنايى كولىك توسىپ الدى. جەكە كابينەتتەرىندە قابىلداعان بەرىك قانيەۆ پەن يۋري پاك اۆتوبۋستى قىزىل جالىن شارپىعاندا قانداي اسەردە بولعانىمدى سۇراپ، ايتقانىمدى ىجداھاتتىلىقپەن تىڭدادى. ءبىر ۋاقىتتا سول كومپانيا وكىلى الۋا ەسىمدى قىز كىرىپ كەلىپ، قولىما بىرنەشە قۇجاتتاردى ۇسىندى دا «قالاعان پاتەردى تاڭداپ الىڭىز» دەدى. ءوز قۇلاعىما ءوزىم سەنبەي، «قالجىڭداپ تۇرعان جوقسىز با؟» دەپ سۇرادىم. سول كەزدە بەرىك پەن يۋري «ءبىز بۇنداي نارسەلەرمەن قالجىڭدامايمىز. 50 گە جۋىق ادامنىڭ جانىن عانا ەمەس، ولاردىڭ مىڭداعان تۋعان-تۋىسىنىڭ كوز جاسىن ساقتاپ قالعان ەرلىگىڭىز ءۇشىن سىزگە دەگەن سىيلىعىمىز» دەدى. قالاي قۋانعانىمدى سوزبەن ايتىپ جەتكىزۋ مۇمكىن ەمەس. جانى جايساڭ، جومارت جاندارعا مىڭ دا ءبىر العىس!»، - دەيدى ەرجان ءامىرحانوۆ.
ءسويتىپ، ءوزى تاڭداعان سەمەي قالاسىنداعى 4 بولمەلى پاتەر ونىڭ اتىنا اۋدارىلعان. ودان بولەك كاسىپكەرلەر باتىردىڭ جانۇياسىنا باعالى سىيلىقتاردى، پالۋان شاكىرتتەرىنە سپورتتىق قۇرال- جابدىقتاردى تارتۋ ەتكەن. ال وسىعان دەيىن ەرجان پاتەر جالداپ تۇرۋعا ءماجبۇر بولعان ەدى. سونداي-اق ول سول جىلى «قازاقستاننىڭ 100 جاڭا ەسىمى» جوباسىنىڭ جەڭىمپازى اتانعان.
بالالار سۋعا كەتپەسىن دەپ...
2022 -جىلدىڭ جازىندا ەرجان ءامىرحانوۆ ءوز اقشاسىنا سەمەيدە جاعاجاي سالدى. قالادا بۇعان دەيىن جابدىقتالعان ءبىر دە ءبىر جاعاجاي جوق-تۇعىن.
«بىلتىر سەمەيدە جەتكىنشەكتىڭ ەرتىس وزەنىنە باتىپ كەتكەنىن ەستىگەننەن كەيىن وقيعانىڭ سەبەپ-سالدارىنا ۇڭىلە ءتۇستىم. وكىنىشكە قاراي، ادامدار، ونىڭ ىشىندە بالالار شومىلۋعا رۇقسات ەتىلمەگەن جاعاجايلارعا بارىپ، سۋعا باتىپ جاتادى. رەسمي تۇردە سۋعا تۇسۋگە بولاتىن جاعاجايدىڭ جوقتىعى سالدارىنان حالىق سونداي جەرلەرگە بارۋعا ءماجبۇر دەسەك وتىرىك ايتقاندىق ەمەس. جاعاجاي سالۋعا وقتالۋىمنىڭ سەبەبى وسىندا»، - دەيدى ول.
وسىلايشا، ەرجان بىلتىردان باستاپ جۇمىسقا كىرىسكەن. ق ر توتەنشە جاعدايلار ءمينيسترىنىڭ اتىنا حات جولداعان. كوپ ۇزاماي اتالعان مينيسترلىك وكىلدەرى حابارلاسىپ، كومەكتەسۋگە ءازىر ەكەندىكتەرىن جەتكىزەدى.
«ولار قاجەتتى تەحنيكالارمەن قامتاماسىز ەتتى. جانار-جاعار ماي مەن باسقا دا شىعىنداردى ءوزىم كوتەردىم. شىنىن ايتقاندا، بۇل قاراپايىم جاتتىقتىرۋشى ءۇشىن از اقشا ەمەس. كولىگىمدى ساتىپ، نەسيە دە الدىم. جاعاجايدىڭ جالپى اۋماعى - 2 گەكتار. جاڭا نىساندا قۇتقارۋشىلار مەن مەديتسينا قىزمەتكەرلەرى كەزەكشىلىك اتقارادى. حالىق جاعاجايعا ەش اقىسىز كەلىپ، سۋعا تۇسەدى. بيىل جازدا وسىندا كۇنىنە 500-1000 شاماسىندا ادام كەلەتىن. الدا ىستەيتىن جۇمىس كوپ. جوسپار بويىنشا مۇندا ۆولەيبول، فۋتبول الاڭدارى بولادى. جىل سايىن وسىندا تۋرنير وتكىزىپ تۇرامىز. جاعالاۋدى بەكىتۋ جۇمىستارىن جۇرگىزۋ كەرەك. سەمەي قالاسى اكىمدىگى تەحنيكامەن جانە جانار- جاعارمايمەن كومەكتەسىپ جىبەرسە دەگەن تىلەگىم بار»، - دەيدى ەرجان ءامىرحانوۆ.
اۆتور
تالعاتجان مۇحامەتبەك ۇلى
