الماتىدا ەسىرتكى تاسىمالداۋشى 47 جاستاعى ايەل ۇستالدى

بۇل تۋرالى قالالىق ءىىد باسپا ءسوز قىزمەتى حابارلادى.

 جەدەل قىزمەت وكىلدەرىنىڭ ايتۋىنشا، 47 جاستاعى كەلىنشەك ەسىرتكى ساتۋمەن، ساقتاۋمەن اينالىسىپ كەلگەن.

ونى اشكەرەلەۋ ءۇشىن پوليتسەيلەر بىرنەشە ارنايى وپەراتسيا جاساۋعا ءماجبۇر بولدى.

«كوبىنە ول ەسىرتكىنى ءوز پاتەرىندە ساتىپ جۇرگەن. كەزەكتى ساۋداسىن ول ماقاتايەۆ پانفيلوۆ كوشەلەرىنىڭ قيىلىسىندا جاساعان. سول جەردە ول كليەنتكە گەرويننىڭ بىرنەشە دوزاسىن ساتقان. بىرنەشە ۋاقىتتان سوڭ پوليتسەيلەر ءيىسشىل ءيتتىڭ كومەگىمەن ونىڭ پاتەرىن ءتىنتىپ شىقتى. كىرە بەرىستەگى شكافتان اق ۇنتاق زات تابىلدى. ماماندار ونىڭ گەروين ەكەنىن انىقتادى»، - دەدى قالالىق ءى ءى د ەسىرتكى بيزنەسىنە قارسى كۇرەس باسقارماسىنىڭ باسشىسى ازامات سادىروۆ.

سونداي-اق، كەلىنشەكتىڭ پاتەرىنەن زاڭ ورىندارىندا تىركەلمەگەن 2 تراۆماتيكالىق تاپانشا، 45 ۇساق كوليبرلى پاترون، 3 ۆەلوسپيەد، پلانشەت، نوۋتبۋك التىن بۇيىمدار، 2 ميلليون 751 مىڭ تەڭگە كولەمىندە اقشا تابىلدى.

«اتالعان زاتتاردىڭ وزىنە تيەسىلى ەكەندىگىن ازاماتشا راستاي المادى. ءبىزدىڭ پايىمداۋىمىزشا، بۇل زاتتار كليەنتتەردىڭ ەسىرتكى ءۇشىن بەرگەن تولەمى بولۋى دا عاجاپ ەمەس. ال اقشانى ەسىرتكى ساتىپ تاۋىپ كەلگەنىن ول مويىندادى»، - دەدى ا. سادىروۆ.

قازىر ول قاماۋعا الىندى. مەدەۋ اۋداندىق ءى ءى ب تەرگەۋ جۇمىستارىن باستاپ كەتتى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى