قازاقستان مەن شىڭجاڭ- ۇيعىر اۆتونومدى ولكەسى 475 ميلليون دوللار بولاتىن وننان اسا كەلىسىمشارتقا قول قويدى
شارا «قىتاي- ەۋرازيا» جەتىنشى كورمەسىنىڭ اياسىندا جۇزەگە اسىرىلدى. ونىڭ شەڭبەرىندە ءۇرىمجى قالاسىندا ەكى ەل بيزنەسمەندەرىنىڭ فورۋمى ءوتتى. شارانى ەلىمىزدىڭ بەيجىڭدەگى ەلشىلىگى مەن «قازاقينۆەست» كومپانياسى وكىلدىگى ۇيىمداستىردى. قۇجاتتار قازاقستاندىق جەمىس- جيدەك ەكسپورتى مەن اقىلدى جىلىجاي جوباسىن قامتيدى. اۋقىمدى شاراعا 130 دان استام بىرلەستىك وكىلى قاتىستى.
قانات بەكتەمبايەۆ، «Xinjiang Organic Food Import Export CO. LTD» ديرەكتورى:
- بۇگىنگى تاڭدا قازاقستاننىڭ ۇلتتىق پاۆيلونى بولۋ ارقاسىندا، ءبىز التى ۇلكەن قىتاي كومپانياسىنىڭ ادامدارىمەن تانىستىق، كەلىستىك. باعا بويىنشا، كولەم بويىنشا اقىلداستىق. بۇيىرتسا، 2022 -جىلدىڭ ونىنشى ايىنان باستاپ جۇمىس باستاپ كەتۋگە ءبىزدىڭ تولىق مۇمكىندىك بار. ودان بولەك ءبىزدىڭ قولىمىزدا دايىن ونىمدەرىمىز بار. سولاردىڭ بارلىعىنا ولكە ارالىق، اۋدان ارالىق ساتاتىن كومپانيالارمەن كەلىسىمگە كەلدىك. وسىنداي وتە قۋانىشتى جاڭالىقتارىمىز بار. بۇدان كەيىن كەدەرگىلەر بولعان، ول كەدەرگىلەردىڭ بارلىعى اقىرىن شەشىلىپ جاتىر.
تاموجنيا تاراپىنان بولسىن، تاسىمال تاراپىنان بولسىن. بيىل شاراعا ەۋرازيا ايماعىنداعى 32 ەلدەن 3 مىڭعا جۋىق كاسىپورىن قاتىستى. قازاقستان قۇرمەتتى قوناق رەتىندە كورمەدە ءىرى پاۆيلونىن اشتى. تاماق جانە جەڭىل ونەركاسىپ سالاسىنىڭ وكىلدەرى ءوزىنىڭ 140 تان اسا ءونىمىن تانىستىردى.
جاڭ شۋجيۋن، «قىتاي- ەۋرازيا» ەكسپوسى حاتشىلىعى باسشىسىنىڭ ورىنباسارى:
- قازاقستان تاراپى نەگىزىنەن جەرگىلىكتى حالىقتىڭ سۇرانىسىنا يە ماي، ۇن، سۋسىن سىندى ازىق- تۇلىك ونىمدەرىن ۇسىندى. ولار كورمەگە كەلۋشىلەردىڭ كوبىنىڭ كوڭىلىنەن شىقتى. ارىپتەستىك ورناتۋدى قالايتىن كاسىپكەرلەر دە كوپ. كورمە ەكى ەل اراسىنداعى ساۋدا- ەكونوميكالىق ىنتىماقتاستىقتى جاڭا دەڭگەيگە كوتەرۋگە سەپتىگىن تيگىزەدى دەپ سەنەمىز.
www.24.kz
