اكە كۇنى ءۇندىستاندىق كاسىپكەر 472 قىزىنان قۇتتىقتاۋ الدى
بۇل جاس ايەلدەر ونىڭ «اسىراندى قىزدارى» ىسپەتتى، ولار بۇدان ونشاقتى جىل بۇرىن اكەسىز، پاناسىز قالىپ، ماحەشتىڭ قامقورلىعىنا بولەنگەن بولاتىن. كاسىپكەر ءوزىنىڭ اعاسى قايتىس بولعاننان كەيىن ونىڭ ەكى قىزىن قامقورلىعىنا العان ەدى. سودان بەرى جەتىمدەرگە كوز قىرىن سالىپ ءجۇرۋ ونىڭ بۇلجىماس ومىرلىك ىسىنە اينالدى. وسى جىلدار بويى گۋدجاراتتىق مەسەنات قىزدارعا ماتەريالدىق كومەك بەرۋمەن قاتار، ولاردىڭ تۇرمىسقا شىعۋ تويلارىن دا وتكىزىپ، وتباسىلىق ومىرلەرىن دە قاعاجۋ قالدىرعان ەمەس.
جىلجىمايتىن مۇلىك، بريلليانت ساتۋدا تابىسقا جەتكەن، وقۋ ورىندارى جەلىسىن يەلەنگەن ماحەش ساۆاني قاراپايىم شارۋا وتباسىنان شىققان. ونىڭ اكەسى ۆاللاببحاي احمەدابادقا راپارد اۋىلىنان، اراب تەڭىزى جاعالاۋىنان كەلدى.
قىرىق جىل بۇرىن ول الماز وڭدەۋدى قولعا الدى، سودان كەيىن بىرتە- بىرتە ءوزىنىڭ بيزنەسىن ۇيىمداستىردى. قازىر ساۆانيدىڭ وتباسى باقۋاتتى تۇرادى، ول قىزداردىڭ ۇزاتۋ تويلارىنا 400 مىڭ رۋپي ءبولىپ وتىرادى. بيىلعى جىلدىڭ وزىندە عانا ول 216 قىزدى ۇزاتتى، وسى تويلاردا ماحەش ولاردىڭ اكەسىنىڭ ءرولىن اتقاردى.
ەسكە سالا كەتەيىك، اسىراۋشىسىنان ايىرىلعان ءۇندىستاندىق ايەلدەردىڭ قىزىن لايىقتى تۇردە ۇزاتۋى اسا قيىن، ادام ومىرىندەگى بۇل ماڭىزدى وقيعا ەلەۋلى شىعىندى قاجەت ەتەدى، ونىڭ ۇستىندە، قىزدىڭ جاساۋىن تۇگەلدەپ بەرۋى ءتيىس.
تاعى ءبىر اتاپ وتەرلىگى، گۋدجاراتتىق مەسەنات ادامداردى ءدىني ايىرماشىلىقتارىنا نەمەسە ناسىلىنە قاراي بولمەيدى. بۇل جونىندە مۇسىلمان قىزى ناحەدا بانۋ ءوزىنىڭ جۇرەكجاردى پىكىرىن ايتتى. ول اكەسىنەن ەرتە ايىرىلىپ، پاناسىز قالعان بولاتىن، ماحەشتىڭ كومەگىمەن ءبىلىم الدى جانە جاقىندا تۇرمىسقا شىقتى. «ول ماعان اكەمنەن دە قىمبات، ءاربىر قىزدىڭ وسىنداي ارقا سۇيەر سەنىمدى تىرەگى بولسا، ارمانى جوق»، - دەيدى ناحەدا بانۋ.
