شىمكەنتتە 46 ميلليون تەڭگە قارىزىن تولەمەي، قاشىپ جۇرگەن ازامات ۇستالدى
قاداعالاۋ ورگانىنىڭ وكىلدەرى سەرىكتەستىك ديرەكتورىنىڭ جاسىرىنعان جەرىن الەۋمەتتىك جەلى ارقىلى انىقتاعان، دەپ حابارلايدى قازاقپارات ءتىلشىسى.
قالالىق پروكۋراتۋرانىڭ باسپا ءسوز قىزمەتى «و» ەسىمدى بورىشكەرگە 2018 -جىلدىڭ قىركۇيەك ايىندا ىزدەۋ جاريالاعانىن جاريا ەتتى. ونىن مەملەكەت الدىنداعى قارىزى 46 ميلليون تەڭگەدەن اسىپ كەتكەن. جەكەمەنشىك سەرىكتەستىككە جەتەكشىلىك ەتە تۇرا ول 2011-2015 -جىلدار ارالىعىندا تابىس سالىعىن تولەمەي كەلگەن. كەيىننەن سوت ۇكىمىمەن اكىمشىلىك جازاعا تارتىلعان. الايدا كاسىپكەر تابىلماعان سوڭ، اتقارۋشىلىق ءىس- ارەكەتتەر ۋاقىتشا توقتاتىلعان. ودان بەرى ءبىر جىلدان اسا ۋاقىت وتسە دە، بورىشكەردىڭ جۇرگەن جەرى انىقتالماعان.
«قالا پروكۋراتۋراسى اقپاراتتىق جۇيەلەر مەن الەۋمەتتىك جەلىلەر ارقىلى بورىشكەردىڭ جۇرگەن جەرىن انىقتاپ، سول جەرگە وزدەرى بارعان. ءسويتىپ قاشقىن كاسىپكەردى ۇستاپ، دەرەۋ سوت ورىنداۋشىلارىنا جەتكىزدى. كەلەسى كۇنى بورىشكەرگە قاتىستى سوت اكتىسىن ورىنداماعانى ءۇشىن اكىمشىلىك ءىس قوزعالىپ، 12625 تەڭگە كولەمىندە ايىپپۇل سالىندى. بورىشكەر قالالىق مامانداندىرىلعان اكىمشىلىك سوتىنىڭ قاۋلىسىنا ساي ا ق ب ت ك 669-بابىمەن كىنالى دەپ تانىلدى. سوت شەشىمىنىڭ ءارى قاراي ورىندالۋى پروكۋرورلاردىڭ باقىلاۋىندا بولادى» دەلىنگەن حابارلامادا.
اۆتور: اينۇر اقبايەۆا
