جولداۋ جۇكتەگەن مىندەتتەر وڭتۇستىكتىڭ 45 ەلدى مەكەنىندە تۇسىندىرىلەدى
ايماق باسشىسى جانسەيىت تۇيمەبايەۆتىڭ باستاماسىمەن جاساقتالعان جۇمىسشى توپ مۇشەلەرى 15 قالا- اۋدانداعى 45 ەلدى مەكەننىڭ تۇرعىندارىمەن كەزدەسىپ، باستى قۇجاتتاعى ون مىندەتتى كەڭىنەن تۇسىندىرمەك، دەپ حابارلايدى قازاقپارات ءتىلشىسى.
جەتەكشىلەرى وبلىس اكىمىنىڭ ورىنباسارلارى بولىپ تابىلاتىن بەس توپ العاشقى ساپارلارىن تۇركىستان، كەنتاۋ قالالارى مەن ماقتاارال، بايدىبەك، تۇلكىباس اۋدانىنان باستادى. كەزدەسۋ بارىسىندا اقپاراتتىق توپ مەملەكەتتىڭ باستى قۇجاتى ەلىمىزدىڭ قوعامدىق- ساياسي ومىرىندە ايرىقشا ورىن الاتىنىن اتاپ ءوتتى. سونداي-اق ولار جولداۋداعى نەگىزگى باعىتتار قازاقستاننىڭ الەمدەگى ەكونوميكالىق، الەۋمەتتىك جانە تەحنولوگيالىق سالالارداعى تەرەڭ جانە قارقىندى وزگەرىستەرگە بەيىمدەلۋىنە مۇمكىندىك بەرەتىنىن جەتكىزدى.
سونىمەن بىرگە ءار سالانىڭ ماماندارىنان قۇرالعان توپ مۇشەلەرى ستراتەگيالىق قۇجاتتا ايتىلعان باسىم باعىتتاردىڭ ماڭىزدىلىعىنا توقتالىپ، تۇرعىنداردىڭ وتىنىشتەرى مەن ساۋالدارىنا جاۋاپ بەردى.
كەزدەسۋ بارىسىندا توپ جەتەكشىلەرى وڭتۇستىكقازاقستاندىقتار ەلباسىمىزدىڭ باستامالارىن قولداپ، ولاردى ىسكە اسىرۋعا بەلسەندى قاتىسىپ، وبلىستىڭ الەۋمەتتىك-ەكونوميكالىق دامۋى مەن ساياسي تۇراقتىلىقتى قامتاماسىز ەتۋگە بار كۇش-جىگەرىن سالاتىنىنا سەنىم ءبىلدىردى.
