مەن 45 جىل بويى قايدا جۇرسەم دە «اتامەكەندى» اۋزىمنان تاستامايمىن - ە. حاسانعاليەۆ
«مەرەيتويلىق كونسەرت بولعاندىقتان بيىلعى كەشتى وزگەشە قىلىپ وتكىزۋدىڭ جولدارىن قاراستىردىق. وتباسىممەن اقىلداسا كەلە، رەترو اندەرگە باسىمدىق بەرگەندى ءجون كوردىك. «اسىل ارمان»، «بوزتورعاي»، «ادەمى-اۋ»، «جانارىم» سىندى ساعىنىشقا اينالعان اندەردى ونەر جۇلدىزدارىمەن بىرگە شىرقاپ، جۇرتىم ءبىر ماۋقىن باسسا دەيمىن.
ۇمىتقاندار بولسا، قايتا ەسىنە السىن. سول اندەر ارقىلى مەنىڭ قۇرداستارىم جاستىق شاقتارىنا، ءىنى-قارىنداستارىم بوزبالا-بويجەتكەن كۇندەرىنە، ۇل-قىزدارىم بالالىق بال داۋرەنگە ءبىر ساياحات جاساپ قايتسا، ءبىزدىڭ ماقساتىمىزدىڭ ورىندالعانى سول بولماق»، - دەيدى ە. حاسانعاليەۆ.
كەشتە مايرا ءىلياسوۆا مەن مايرا مۇحامەد قىزى، نۇرلان ابدۋللين، «مۇزارت» پەن «جىگىتتەر» جانە ت. ب. ونەر جۇلدىزدارى قاتىسادى.
باسىلىمعا بەرگەن سۇحباتىندا ءانشى-كومپازيتور «اتامەكەن» ءانىنىڭ شىعۋ تاريحىمەن دە ءبولىستى.
ونىڭ ايتۋىنشا، 1968 - جىلدان باستاپ، قازاق ونەرپازدارى گاسترولدىك ساپارمەن الىس-جاقىن ەلدەرگە شىعا باستادى. سوندا وزگە ەلدىڭ ساحناسىندا قازاقتىڭ ءور مىنەزىن، كوڭىلىنىڭ دارقاندىعى مەن جەرىنىڭ بايلىعىن تانىتاتىن ءبىر ءان جازۋ ارمانى بولعان.
«ۇزاق ۋاقىت ىزدەنىستەن كەيىن 1970 - جىلى «اتامەكەن» دۇنيەگە كەلدى. مۋزىكانىڭ كوڭىلىمنەن شىققانى سونداي، تەز ارادا ساحناعا الىپ شىعىپ، جۇرتپەن بولىسكىم كەلدى. الىپ-ۇشىپ ءسوزىن جازاتىن اقىن ىزدەدىم. ويىما بىردەن قادىر مىرزا ءالى ءتۇستى.
اۋەن اقىننىڭ كوڭىلىنەن شىقتى. ءسوز جازىپ بەرۋگە كەلىستى. سول جىلى رەسپۋبليكا سارايىندا قازاق ك س ر-ىنىڭ 50 جىلدىعىنا ارنالعان ۇلكەن كونسەرت ءوتتى. اتالعان كەشتە «اتامەكەندى» العاش رەت نۇرعالي ءنۇسىپجانوۆ ەكەۋمىز قوس داۋىستا ورىندادىق.
ءدال سول جىلى وداق ونەرپازدارى تۇڭعىش رەت شۆەتسيا مەن فينلياندياعا گاسترولدىك ساپارمەن باردى. ونەر دەلەگاتسياسىنىڭ ىشىندە ءبىز دە بولدىق. شۆەتسيا استاناسى ستوكگولمنىڭ ەڭ ۇلكەن ساحناسىندا «اتامەكەن» شىرقالدى.
ءاندى ورىنداپ بولعانىمىز سول ەدى، ءبىر توپ ادام ساحناعا قاراي قاۋمالاي باستادى. جاسى مەن جاسامىسى بار، اراسىندا بالا-شاعا دا ءجۇر. جۇزدەرى جىلى ۇشىراي كەتتى، سويتسەك ءوز قانداستارىمىز ەكەن. ول كەزدە ءتارتىپ قاتال. وقىس قيمىل جاساپ، ارتىق ءسوز ايتۋعا بولمايدى. قول جۋۋ ءۇشىن دە رۇقسات سۇرايتىنبىز.
قاراقۇرىم حالىق جابىلا قۇشاقتاپ، بەتىمىزدەن ءسۇيىپ جاتىر، كوزدەرىنە جاس العاندار دا بار. نە ىستەرىمىزدى بىلمەي اڭتارىلىپ قالدىق. سويتسەك، بۇل ءان باۋىرلاردىڭ تۋعان جەرگە دەگەن ساعىنىشىن مازداتىپ جىبەرگەن ەكەن. «وشكەنىمىزدى قايتا جاڭعىرتتىڭدار، راحمەت سەندەرگە»، - دەپ العىستارىن جاۋدىردى. سودان بەرى 45 جىل بويى قايدا جۇرسەم دە، قانداي ساحناعا شىقسام دا، «اتامەكەندى» اۋزىمنان تاستامايمىن»، - دەدى ە. حاسانعاليەۆ.
