بەيىمبەت مايلين تۋرالى 45 سەريالى دەرەكتى فيلم تۇسىرىلەدى

بەيىمبەت مايلين - قازاقتىڭ كورنەكتى جازۋشىسى، اقىن، دراماتۋرگ، پۋبليتسيست، قازاق ادەبيەتىن قالىپتاستىرۋشىلاردىڭ ءبىرى.

دەرەكتى فيلمنىڭ ءتۇسىرىلىمى 7- قاراشادا الماتىدا باستالادى. سول ءۇشىن قوستاناي وبلىسىنىڭ تاران اۋدانىنان وڭتۇستىك استاناعا دەلەگاتسيا اتتاندى. ونىڭ قۇرامىندا مايليننىڭ ۇرپاقتارى - توبىل ەلدى مەكەنىندە تۇراتىن مەيرام مەن قۋانىش باقبەرگەنوۆتەر، كىتاپحانالار جۇيەسىنىڭ ديرەكتورى گاۋھار اسانوۆا، تىلدەردى دامىتۋ ورتالىعىنىڭ جەتەكشىسى اقتولقىن قافيزوۆا جانە اۋداندىق مادەنيەت ءبولىمىنىڭ جەتەكشىسى سۆەتلانا قۇلجانوۆالار بار.

ايتا كەتەيىك، بەس جىلدان سوڭ جازۋشىنىڭ مەرەيتويى رەسپۋبليكا دەڭگەيىندە تويلانادى، سوعان قاراماستان، تاراندىقتار بيىلعى مەرەيتوي - 120 جىلدىقتى اتاۋسىز قالدىرماۋدى ۇيعارعان. جىلدىڭ باسىندا اۋداندا مايليننىڭ قۇرمەتىنە ارنالعان مادەني جانە سپورتتىق شارالار ءوتتى. جازۋشى دۇنيەگە كەلگەن بۇرىنعى جالشى اۋىلىندا مەشىت جوندەلىپ، جاڭادان پايدالانۋعا بەرىلدى.

نەگىزگى ءىرى مادەني شارالار جازدا اتالىپ ءوتتى. وعان بۇكىل وبلىستان جانە ەلىمىزدىڭ باسقا دا وڭىرلەرىنەن قوناقتار مەن مايلين ۇرپاقتارى كەلدى.

بەيىمبەت مايلين 1894-جىلى 15- قاراشادا قازىرگى قوستاناي وبلىسىنىڭ تاران اۋدانىندا دۇنيەگە كەلگەن. ونىڭ قالام تەربەمەگەن جانرى جوق، ول - «شانشار مولدا»، «تالتاڭبايدىڭ ءتارتىبى»، «نەكە قيار»، «مايدان»، «جالبىر» سياقتى كوپتەگەن پەسانىڭ اۆتورى. تانىمال شىعارماسى - ونىڭ العاشقى پوۆەسى - «شۇعانىڭ بەلگىسى». جازۋشى ساياسي قۋعىن-سۇرگىننىڭ قۇربانى بولدى.

tengrinews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى